YMA, Kumpinu doletna leh Ram leh Hnam hmangaihna puakchhuak

Kum 1885 khan indian pakua leh sap pahnih huaihawtin Indian National Congress (INC) din a ni a, president hmasa ber pawh indian a ni. INC hi thawklehkhata din thut a ni lo a, kum 1860 vel atanga inmun tawh a ni. Amaherawhchu, INC din dan hi zirchiangtu tam tak chuan Kumpinu rorelna hnuaia India mipui lungawilote thawidamna hlet tiin ‘safety valve theory’ an vuah a, historian-te inhnialna tawp thei lo a hring chhuak a ni.

Kum 1924 October 24 khan Calcutta, Gauhati leh Shillong-a Mizo zirlaite Shillong-ah an kalkhawm a. Mi hmasawn dan an hmu a, an rualawt a ni. “Engpawhnise bul i tan phawt mai ang u” tiin Lushai Student Association (LSA) an din a; mahse rei vak loah an zuai leh a. Kum 1935 khan Shillong-ah LSA chu tuaithar lehin hruaitu hmasa ber te chu president R.Buchhawna, general secretary Lalhmuaka, treasurer Hrawva te an ni. Kum 1946-ah LSA chu Mizo Zirlai Pawl (MZP) tia thlak a ni a, a hmunpui pawh Aizawl a ni ta a ni.

Kum 1935 June 3 khan Mizo pariat leh sap pathum huaihawtin Young Lushai Association (YLA) din rawt a ni a. June 15-ah nepali sikul, Sikulpuikawnah YLA din a ni. President hmasa ber chu Rev. Lewis Evans a ni a, Secretary hmasa berte chu Pasena leh Vankhuma an ni. Kum 1945 chhoah YLA chu Mizote political party hmasa ber tura siam rawtna a awm a, mahse central committee-in a hnawl a ni. YLA dinnaa hnarkaitu zingah sap missionary-te an awm a, saprama tlawmngai pawl awm tawh Young Men Christian Association (YMCA) leh Young Wales Association (YWA) kha min tinzawnpui lutuk a ni. He rawtna hnawl vang hi ni maw? Mizo Union (MU) leh United Mizo Freedom Organization (UMFO) a piang zui a. Kum 1947 October 7-ah YLA pawh chu Young Mizo Association (YMA) tia thlak a ni a, Mizo Thalai Pawl (MTP) tia thlak awm tak a ni mawle.

YMA din huaihawtnaah khan eng rilru pua sapho kha tel ve nge maw an nih le? Barh luih nge tihpalh? A tha zawk tihdan dang thlan tur a awm lo em ni? Pumpelh theih a ni em? Mizo pariat zingah khan president ni tlak an awm lo em ni? Mizo thalaiten MZP an din thei tho si a! Zawhna a tam hle mai!

Mizo thlangtla hmasate khan Bangladesh, Tripura, Assam, Manipur-a tlangram leh phaitual hmun hrang hrang kan thlengthla thui hman viau. Lusei hlawmpui chu Mizoramah kan chambang ta a. Chhim lamah Lusei ni lo- Mara, Lai, Pang, Bawm te kan awm a. Mizo thahnem tak chu Chin Hills-ah kan chambang bawk. Heng ram hrangte hi khatih hunlai khan British India-Burma a ni.

Mizote hi tualthah ching leh lu lak ching kan ni lo. Ngam leh ngam kan indo a, chutiang chuan ral kan rel thin. Kan tam ve zel a, a chi hlawm te tein kan inzar pharh zel a. Kan tana hnawk chu kan thianfai a, min luhchilh tum tute pawh kan beilet thin. Hnam humhalh kan tum a, kum 1700 vel atangin ram zauh zel tumin hnam dangte kan tlawhpawh tawh. Chutiang hnam chu kan ni a, Israel fate Ramtiam sualchhuah tum nen kan inang reng. He kan chetlakna hi sapho tan mita lungte awm tluka hnawk a ni ang, vailian vawi 2-na a hring ta a ni.

Kum 1889 atangin saphoin min bei leh a. Kum 1890-ah Aizawl an la a, min awpbet zui nghal a ni. Ram inrelbawlna kengkawh nghalin India zalen hma chu an chhuak ta lo. Missionary hmasa ber Rev. William Williams kha kum 1891 March 20-ah Aizawl a lo thleng a, April 17-ah a chhuahsan leh a ni. Kum 1894 January 11-ah Rev. J.H. Lorrain leh Rev. F.W. Savidge ten Sairang an lo thleng a, anni hnu hian chatlak awm meuh lovin sap missionary engemawzat an lo lut reng a, thenkhat phei chu ram buai hnu thlengin an awm a ni.

Khatih hunlaia kan nunphung leh khawsak dan thlirin, kumpinu lalram tinghet tur leh anmahni thuawih turin politik leh sakhaw hmangin min bei a, lamtang siam an tum a ni. Kum 1894 feb-mar thlaah a-aw-b siam a ni a, hemi kum April thlaah sikul hawn a ni. Ramhuai hneh thei sakhuaah taksa leh thlarau himna beiseiin kan intulut a. Amaherawhchu kristiannaah hian lungawi pawh ni ila, min hmelhriat tir dan leh min zui tir danah fuh lo a awm a ni. Kum 1896-ah Mizo zinga kristian hmasa ber turin Taibuanga te thiandunin hming an pe a, mahse an kristian zui reng lo a ni maithei. Baptisma chang hmasa berte chu Khuma leh Khara an ni a, kum 1899 June 25-ah an chang. Kum 1911-ah matric kan pass a, 1924-ah BA kan pass a. Saphoin min awp atanga kum 30 a liam meuh chuan an thuhnuaiah kan awm hneh ta hle a ni.

Harhna vawi 1-na thlen kum 1906-ah kristian 98 kan awm a, YMA din kum 1935-a Harhna vawi 4-na thlen hian Presbyterian Kohhran member 63,873 kan awm. YMA din a nih hma hret thlengin zofate khawvelah kohhran hrang pasarih a piang hman a; mahse sapram atanga chawkluh, tualto kohhran ni lo, sap hming pu vek an ni! Sap nel nualin kristian min nih tir an tum a, kan khawr viau, a sawt mawh hle bawk. Khuang telloa chai thiam lo, Mizote lunglenna Mizo irawm chhuak hla a pian atangin kristian kan pung ta zawt mai a. Heng hlate hi ngun taka kan en chuan, sakhuana huangchhung atanga inawpbehna chhanletna a tling tih kan hmu thei ang.

Kristian kan nih hnu hian kan kristian hma nunphung leh tihdan tha tam tak kan kalsan a, chutiang renga kan kal chuan kan nihna kan hloh mai dawn a ni. ‘Kristiannaah chuan kan hnam nunphung hnawk ti khawpin kan sakhaw mi titih ta hial a. Mithiam hmasaten kristianna kan lak dan rau ta lutuk chu hnam tan a hlauhawm thei dawnin an hria a, an vei hle. Kristian sakhua hian thih hnua chatuan nunna chauh tinzawn lovin, he khawvela kan chen chhung pawhin thilsiam dangte laka nun dan tha lantir te pawh a kawk tel tho a ni tih inzirtirna atan YMA hi an din niin a lang,’ tiin K.Sapdanga chuan a sawi a. ‘Hei bakah hnam anga kan hmasawnna tur pawh an dah lian hle tih a chiang viau,’ a ti bawk.

Mizote huapzo, kristian hma nunphung leh tihdan tha chhawmnungtu leh zirtirtu tur; kohhran hrang khaikhawm thei tur, zofate hmasawnna ngaihtuahtu pawl din kha a hunlai boruak thlir thiam tan chuan tihmakmawh niin a lang. Helam chungchang hi kum 1935-a sap kohhran hruaitu pathum lo zinte khan an sawi. ‘Hemi tuma Mizoram changkan zel nana an sihhmuh ber pakhat chu kawng tinrenga Mizote mawhphurhna pek tam a ni. Sap ramah pawh chutiang ang khawtlang kaihhruaina pawl a tangkai thu te an sawi bawk,’ tiin YLA hruaitu hmasa pawl Pu Muka chuan a sawi a. Sapho khan YLA huangchhunga mawhphurhna kha min pe ngei a, thuneihna erawh min pe mai lo; hun rei tak chhung hruaitu nihna an chelh zui a ni.

Mizo ziak leh chhiar thiam hmasate khan an thiamna mipui tan hman an duh a ni. Kristian kan nih hnuah kohhran huangpawna thil tha ti tura thalai huaikhawm a tul a. Chung mite chu kohhran hrang atanga lo kal khawm an ni dawn si a, a phuarkhawmtu a ngai. Chhiatni-thatnia insawngbawl dan kan kalsan thei lo, mahse kohhran hrang tihdan inpersan awm thei kha a fel lo. Heng khaikhawmtu hi kan mamawh a ni.

Rev. Dr. H. Vanlalauva chuan, ‘hriselna leh thianghlimna kawnga hmahruaitu leh zirtirtu atan YMA din niin, khawtinah bungbel leh in leh a vel vawn fai dan min zirtir a, chumi avanga hriselna leh faina kawnga tun dinhmun thleng thei kan ni’ tiin a sawi a. C.Rokhuma pawhin khawtlang nun hmasawn zel tura inkaihhruai kan mamawh zia tarlangin, ‘khang hunlai Mizote kha thianghlimna kawng, a bik takin zunram thiar thuah kan hnufual hle. Kum 1950 thlenga YMA thuchah zinga an dah chu zunram thiar thu a ni’ tiin mipui vantlang zirtir kan ngaih thu a sawi. Heti lama mipui nawlpuiin inkaihhruaina mumal leh zirtirtu kan mamawh dan hi phat thu a awm lo e.

Mizo khawtlang nuna zawlbuk awmzia sawi nawn a tul lo a. Amaherawhchu YMA din atanga kum 3-na, 1938-ah zawlbuk tihtawp a ni. Hemi hma daih hian nunphung leh khawsak dan inthlak danglam vangin kan khawtlang nunah zawlbukin hlutna a hloh chho hret hret a, tihtawp mai a la tul dawn tih pawh a lang ruak tawh tih hi kan inhrilh dan a ni. Khawtlang mipaho kha kan riakkhawm dur dur reng thei lo a nih pawhin titawp kher lovin tihdanglam (transform) emaw, sikul din chhoh mek nen a suihfin (synthesize) theihloh em ni? Hetiang hi kan hun tawn a nih avangin Zawlbuk thlakna tur tha tak, kan changkang zel leh thangthar zel te mil tur ngaihtuah a ngai a, YLA din chu loh theih loh a ni.

Kumpinu lalramah hman atanga tun thlengin, lal chhungkua leh mipui rorelna fel takin a kal thei a; Mizoramah erawh lal chungkua leh mipui vantlang inkarah hem thlak a awm em ni? Sapho khan siamrem tumna an nei lo a, a zual zawpui vailenhlo tih ang chauh a ni. Ram inawpna dan fet tak an siam a, phutluih kuli leh chhiah nen. Khaw tina lalten chaprahsi leh sapte an hlau si a, mipui nawlpui tan a rit em em a ni. Kum 300 chuang mizo khawtlang inrelbawldan chu a hman tlak loh tiin kum 1954-ah Mizo lalte ban an ni ta. Kum 1945-a rawtna kha pawm nise Mizote politics khawthlir a danglam maithei; chutih laiin political party hmasa pahnih, MU leh UMFO erawh mu leh ar ang hlauh kan ni zui ta! Kristianna huangchhungah, mihring rilru thatna nen politik dik hmelhriat tuma kan beihna kha daltu a awm em ni? Inhuatna - ka chan tha se midang chan chhia se tiin, intihelna nen politik bul kan tan a, a sawp chu nasa tak a ni. A pawi ngei mai!

Kum 1920 chhoah chuan Mizo engemawzat rampawnah kan awm tawh. Hetih hunlai hian India mipuiten kumpinu awpbehna lak atangin zalenna an sual mup mup a, ram leh hnam hmangaihna a tho hle. Rampawn mizo zirlaite pawh an rualawt hle a ni. YMA din hma hian India mipuiten politikal party leh politik rawngkai pawl 25 zet an din tawh. Mizoramah pawh Telela chuan mipuite tawrhna chu ziakin bawrhsap hnena thlen turin Zosaphluia a pe a. Bawrhsap hnen a thlen leh thlenloh hriat a ni lo a, awmzia a neih engmah a awm hek lo. Telela erawh a beidawng duh lo, kum 1925-ah thurualpui a nei tan a, ‘politik chu move a ni ta, ropui tak a ni’ a ti hial a ni. Tichuan, Mizoram inawpdan chu Rev. J.J.M. Nichols Roy, Assam Urban Area MLA hnenah an thlen a, hei hi bawrhsapin a lo hriat chuan Telela leh a thurualpuite chu manin kum 1926 October 22 khan Jail-ah an khung ta a ni. Mipui phawklek dan tur hi zuk ngaihruatpui thiam a har a, a thawidamna hlet erawh zawn a tul ang.

Aizawl atanga khaw hrang hranga YLA chanchin pudarh a dintute hi a hunlaia rawn kai, Aizawl kal ve fo leh chanchin hre deuh kan ni tlangpui. Khawtina YLA hruaitu hmasate pawh chutiang mi chu kan ni fur. Lalte, tirhkohte leh an tualchhuahpuite kan ni deuh awm e. Hetih hunlaia lalte hi sapho duhsakna chang pha, an thuawih thei leh an lamtang te, chaprahsi leh sipai bang te kan awm teuh tawh a ni. Tirhkohte pawh mission sapte thuhnuaia awm vek kan ni. Tlang tina mahnia ro inrel thin mizote chu, hmun pakhat atanga ro rel sak kan ni ta a. Khatia khawtina YLA a din chum chum hnu pawh khan, a fawng chu Aizawl atanga chelh tlat a ni. Hei hian vawiina YMA kalphung a hril em tih chu mimal thutlukna ni rawh se.

Colonialism hunlai khan ram chak zawkten ram chak lo zawkte min hneh a, min awpbet a. Heng ram chak zawkte hian, rorelna kawng engkimah anmahni hmakhaw ngai chung leh an lalram insawhngheh zelna turin thil an ti a. Hei hi han thlir thuak chuan thil pangngai niin a lang a, mahse chik zawka en chet chet chuan a ni si lo. ‘Then darh la, awpbet rawh’ tih kha an thupui ber a ni. Ram thar lak apiangah sawrkar mi, sumdawng leh missionary an lo lang vat a; kumpinu puanzar leh kraws a inzui tlat a ni. Anmahni lamtang an siam a, mipui min phel darh a; awpbeha awmte tan chuan chak lo zawk nih nen tanrual harsa tak a ni. Lehlamah sakhaw thu min hrilh a, lehlamah thuneihna hmanga rawk kan ni thung. Inawpbehna chuan mi laklawhah min siam a, kan nihnaah kan buai a, hnam thuthlunga kirlehna leh ram hmangaihna a piang ta a ni. Sapho nen thiltih leh ngaihtuahna hmangin kan indo a; a ngam chu kan ngam khawp, mahse kan hneh lo a ni. Tichuan thil tam tak min barh lui ta sak sak a, vawiin thlengin saptawng leh sap nunphung chuan min fan hneh ta hle a nih hi! Hei hi inawpbehna chi thar (neo-colonialism) chu a ni mai.