Mizote leh Faina

                       

   

Mizo te hian faina kan ngaipawimawh tak zet em? tih zawhna hi inzawt ta vek ila, kan chhanna a inang lo nual maithei. Tun tumah pawh hian he zawhna hi chhan kan tum dawn a ni.

Hun rei tawh deuh han thlir kir ila. Kan Pi Pu te hun lai, han ti ve khanglang ila, hmanlai deuha Mizoten’n faina leh thianghlimna kan ngaihdan hi thil ngaihtuah chian ngai tak niin a lang. Mi thenkhatin hmanlai Mizote kha faina ngaipawimawh lo leh tladah lutuk, hnam bal tak anga kan insawi mai thin hi a chhan chhuichian chakawm tak a ni. Fai tura in leh lo, mahni taksa han vawn thianghlim hliau hliau te kha an nitin khawsak dan, hnam nunphung leh eizawnna nen a inrem thei chiah lo te pawh niin a lang a. Tin, helam kawng inzirtirna nachang hriat loh vang te, a tulna hriat tawk loh vang te pawh a ni thei ang em? An phaktawk leh an chimchinah chuan faina hi an ngaipawimawh ve viau tho lo ang maw? Mizo upa thufing kan tih te pawh kha an ngaipawimawh viau mai. Khawthar zuan a nih pawhin hmun zo leh boruak hrisel tur kha an zawng ve viau a nia.

Khi thlirna khi a thlir dan kawngah chuan a ni thei tho mai. Amaherawhchu thlirna kawng khat chauh chu a buk a dik lo ve thei a. A lehlamah chuan inthiarna mumal awm lo, daihnaia inthiar mai thin an nih thu te, ran vulh khuahkhirh a ni lo te, nau ek pawh uipui an liahfai tir mai zel te, tawngkamah pawh “sakhi pawh a inbual ngailo, mahse a mam zir ziar reng mai” han tih tlat te atang khan faina kawnga an khawsak phung tur a sang lem lo ang tih a rin theih ve tho mai. Tin, hmun zo bawh kan nih avang tak hian duhthala tui hmantur kan neih loh thu hi hman atanga kan buaina a ni a, tuikang nghah te chu kan nunphung a ni titih deuh hial mai. Tui duhtawka hman tur kan neihloh na na na chuan thianghlimna kawngah kan sang thei lo a ni.

Kristian kan nih hnu hi han thlir leh thuak thuak ila. Mizo mithiam thenkhat chuan khatia Mizote Kristian kan lo nih tak avang leh, faina leh thianghlimna kawnga sap missionary-te zirtirna kan dawn avanga hmasawn kan nih thu hi an ziak fo a…hei hi thil dik a ni thei ang em? A dik thui khawp mai. Mizote hi Kristian ni ta lo ila tuna kan dinhmun hi kan phak ang em? Sap missionary-te kha lo lut lovin zirtirna min rawn pe ta lo se tun ang hi kan ni ang em? tih hi ngaihtuah a ngai khawp mai.

Rev. Dr. H. Vanlalauva chuan, Kum 2011 Presbyterian Kohhran Nilai leh Beihrual Thupui Bu ah chuan, “hriselna leh thianghlimna kawnga hmahruaitu leh zirtirtu atan  Kristian Missionary-te khan YMA dinin, khawtinah bungbel leh in leh a vel vawn fai dan min zirtir a, chumi avanga hriselna leh faina kawnga tun dinhmun thleng thei kan ni” tiin a sawi a. Tin, Pu C.Rokhuma pawhin Kum 2010 Central YMA Platinum Jubilee Souvenir-ah khan khawtlang nun hmasawn zel tura inkaihhruai kan mamawh zia tarlangin, “khang hunlai Mizo te kha thianghlimna kawng, a bik takin zunram thiar thuah kan hnufual hle. Kum 1950 thlenga YMA thuchah zinga an dah chu ‘zunram thiar thu’ a ni” tiin mipui vantlang zirtir kan ngaih hle thu a sawi ve bawk. Hengte hian faina lam kawnga kan dinhmun leh zirtirtu kan mamawh zia a tarlang chiang hle a ni. Chuvangin, khatia Kristian kan han nih chhoh lai vela kan khawsak phung inthlak chho leh kan dinhmun zirchiangtute thuziak en hi chuan faina lam hi kan lo ngaipawimawh tehchiam lo a niang a tih pawh a ngaihtuah theih a ni. Heng te ngaihtuah hi chuan faina leh thianghlimna kawnga hma kan sawnna chhan hi chu Kristian kan nih vang a tih loh theih lohin a lang.

Kristianna hian thil tha tak tak min zirtir a ni tih hi chu phat thu a cheng lo. Han sawi kai zauh ila, kan Kristianna hi ‘practical’ se, a takin nunpui ila, faina kawngah pawh hian hma kan sawn ang maw le. Hmanlai bawk kha han sawi leh ta ila, kan pi leh pu te kha chu Kristian an ni lo na a, mahse an phaktawkah upate thu hla te, vantlang dan te kha an ngaipawmawh em em mai a. Khawtlang ngaihpawimawhna an nei lianin vantlang tana hnawksak nih kha an hlau em em a ni. He nun hi a mawi hle a, Kristian an nih hnu pawh khan he nundan mawi hi an chhawm zel a, tunlai hunah pawh kan chhunzawm ngei zel tur thil tha ni.

Amaherawhchu kan han changkan chho ta deuh deuh a, a bik takin khawpui leh thingtlang khawlian deuhah, faina leh thianghlimna kawnga kan khawsak dan en hi chuan ram dan, sawrkar dan te hi kan pawisa lo em mai a. A nawlpuia lakin kan bawlhhlawh paih dan te, kan tuichhe luantir dan te han en hian a tu amah hian vantlang ngaihpawimawhna (civic sense) te hi kan nei ta lo emaw tih tur a ni. Khawtlang thatna tur atana mahnia mawhphurhna inbel (moral responsibility) hi kan hreh em em mai a, hei hi kan vaiin kan tuar a ni. A dik tak chuan tlangrama khawsa kan ni a, khawi hmun pawh hi fai tur kan nih laiin kan rilru puthmang thianghlim tawk lo avang hian pawnlam hmuhtheihah pawh kan fai tawk lo a; khawtlang, vantlang, kan khua \heuh leh kan khawpui faina ngei ngei pawh kan ngaipawimawh ta lo a. Kan vaiin kan tuar leh si a ni.

Faina kawngah hian Sawrkar hmalakna hi chu a awm nual mai a, engemaw faina lam hawi program bik hmang tura han kalkhawm hi chuan kan thawk tha viau zel ni te pawhin a lang a, a huho chuan kan tha viau ni te pawhin a hriat. Mahse a tak takah, a pawimawh ber chu vantlang nunah leh mimal nunah hian faina seng luh hi a ngai a, fai duhna – fai chakna kan neih a ngai. Fai tura tha thawh hi mahnia mawha lak ngamna kan neih a ngai a, chu level chu kan la thleng lo em aw ka ti thin. Kawng tam takah mahni chauh kan inngaihtuah hian faina lam hian kan rilru a luah pha leh thin lo a, bawlhhlawh leh mihring khawsakna thli hmangin mi pawi kan sawi leh fo a ni.

Mahatma Gandhi piancham vawi 145-na kum 2014 atangin India ram pum huapa Clean India Mission (Swachh Bharat Mission) beihpui thlak a ni a, Mizoramah pawh sawrkarin tan a la nasa a. Pawnlama inthiar awmlohna (Open Defecation Free State) kan nih theih nan beihpui thlak mek a ni. Kum 2016 atangin khawpui fai inelna (Swachh Survekshan) kalpui tan a ni bawk a. Tin, Mizoramah hian kum 1977 atangin kumtin faina hapta hi Mahatma Gandhi piancham denchhenin kan lo hmang tawh thin a. Chuti chu ni mahse kan rilru ah hian a tla na vak lo em ni ang aw a tih theih. Faina hi mahni kovah la in sawrkar hmalakna kan tawiawm that a tul hle a, beihpui thlak lai chauh nilovin mimal nuna senglutin kan nunpui a ngai. Tichuan ram pum huapa sawrkar hmalakna pawh a hlawhtling lehzual ang. 

Kan thusawi hmasa lamah khan han let leh ta ila. Kan mizo pi leh pute khan upa thufing te kha an ngaipawimawh em em mai a, entirnan tlemte han la chhuak ila, ‘Khuavang ramri kham sa’ te kha an ngaipawimawh em em a, ‘kawr kana in sak’ te kha an duh lo reng reng a ni. Heng te hi an puithuna hrim hrim lam aimahin vantlang nunhona atana pawimawh a ni a, hriselna leh thianghlimna thu ah pawh awmzia thui tak a nei tlat a ni. Tin, tawngkamah thil fai tawk lo sawinan ‘vawkpui inbual ang’ tih te pawh a awm a, fai tawklo sawina tawng upa a awm si chuan faina lam ngaihpawimawhna an nei tih a lang theiin a hriat. A pawimawh ber leh ka sawi tum tak chu vantlang zahna leh ngaihpawimawhna lian tak an nei kha a ni.

            He kan mizo pi pu te nundan mawi tak hi tunlai hunah hian kan chhawm nun leh a ngai hle. Mizo thufing te, tawng upa kan tih mai te hi ngun takin han belchiang ila, midang ngaihpawimawhna te, vantlang dan zahna te, nunhonaa midang ngaihchan thiamna te, a dang te pawh hetiang lam hawi hi a tam khawp mai. Heng te hi a mawi ka ti a, kan inzirtir thar leh a ngai a ni.

A bik takin khawpuiah, kan nunhonaah hian mahni chauh kan inngaihtuah (individualist) ta lutuk a, chu chuan midang ngaihpawimawhlohna a hring a, faina kawngah pawh kan nun a phawsawlh ta riau a, bawlhhlawh kan thlahdah a, chu chu fur ruahtui tla hmasaah hmuh theihin veng mawng lam leh khawchhung luikawrah te a lo lang chhuak ta thin a ni. Mi thenkhat te phei hi chuan ruahtui tam laiin ek in te kan han hawng mai thin a nia! a vantlang zahloh thlak lutuk a, a pawi hle a ni. Faina leh thianghlimna hi mahni mawhah theuh la ngam ila chu hetiang hi kan ni lo ang maw le.

Faina ngaihpawimawh hi rilru puthmang dik lampang a ni zawk mah a. Kan rilru hi hrisel se, faiin thianghlim se, pawnlam hmuhtheihah pawh hma kan sawnpui viau ang. Mizoramah khawfai leh entawntlak tak tak an awm a, Biate te, NE Khawdungsei te, a dang dang te pawh a awm. Engatinge hetiang hian an fai bik em em kan tih chuan, khaw mipui naupang atanga puitling, an vaiin an rilru puthmang a dik a ni. Faina chu an mawhphurhnaah an ngai vek a, tupawhin khawlaiah bawlhhlawh hmu se an thianfai nghal mai thin niin an sawi. A hmun loah chuan bawlhhlawh an paih ngai lo a, khawchhung luikawr thlengin a fai vek mai a ni. He mawhphurhna (moral responsibility) hi an intuh nghet a, fai an tum a, a tak takin an nunpui a, an lo fai mai a ni. Thil harsa engmah a awm lo. Chuvangin fai tur hian engmah chhuanlam a a awm lo a, kan ngaihpawimawh tawk leh ngaihpawimawh tawkloh a thu a ni mai. Kan vai hian fai hi kan tlin a, kan tum phawt chuan kan ti thei a, kan rilru puthmang thlak danglam chiah hi kan mamawh a ni.

Mipui hi zirtir kan harsa lo. Kristian kan nihna te, Bible zirtirna te hi kan rilru leh taksa fai nan, chhunglam leh pawnlam thianghlim nana kan hman loh chuan kan Kristian nun a practical lo hle tihna a ni ang. Pathian thianghlim be tu te kan ni a, sual bawlhhlawh kai lo turin kan infuih a, chutianga sual kan lo kai palh a nih pawhin a tlenfaina nen lam kan inhrilh a. Vanram kan suangtuah dan pawh thianghlimnaa khat, sual bawlhhlawh awm lo a ni. He thianghlimna leh sual bawlhhlawh lak a\anga inserhhranna theology hi khawvel thila thianghlimna, vantlang nuna faina, bawlhhlawh leh tenawm lak a\anga fihlim khawtlang fai din nan i hmang hlauh ang u.

German theologian Jurgen Moltmann-a chuan, hun hnuhnung thu leh Kristian-te beiseina la kawpin “…chu chuan hmalam ena hmalam pan zel leh chumi avanga tun hun pawh tihdanglama siamthat zel…” thu a sawi a. Moltmann-a sawi ang hian nitin nuna tun hun zel hi hmang tha ila, a dik lo lai siam tha zel bawk ila. Rilru fai se, ngaihtuahna thianghlim se, nitin khawsak phung pawnlam hmuhtheihah pawh faina kan ngaipawimawh deuh deuhin a rinawm.

Isua hi taksa leh thlarau chhhandamtu a ni a, chhandamna famkim min pe. Chu chu lei leh van huapzo a ni a, ama nihna dik tak pawh a ni. Kan duh chin kan pawm ngawt hian Isua nihna a tidanglam lo. Zofaten thlarau mi kan hrilhfiah dan te hi ennawn a ngai. Thil pahnih (dichotomy), van-lei (heaven-earth), thianghlim-khawvel (sacred-secular), taksa-thlarau (physical-spiritual) kan la hrang lutuk leh kan kaldun tir hleithei lo hian thlarau khawvel leh hringnun khawvel min thliarhran tir a, kan thlarau nun leh kan nitin nun a inzawm tha tawk lo a. Thenkhat chu thlarau mi viau e tilovin kan ngaih te hi a sam phian a, Pathian thu sawi mawlh mawlh chungin midang venthawnna nei miahlohin bawlhhlawh kan paih leh mai a. Kan tawrh tur a nih loh chuan hnawmhnawk, tenawm leh rimchhia te hi kan ngaithei riau zel, kan ngaipawimawh vak tlat lo. Hetiang nundan te hi Kristian nun dan tha a ni lo ang.

Faina ngaipawimawh zel tur hian enge kan hmabak? enge kan tih tur? chu kan tih tur chu awmze nei takin engtinnge kan tih hlawhtlin theih ang? Kan sawi ta nual a, a hriat hi chu kan hria, kan mutan ber chu kan rilru puthmang hi niin a lang a, ngaihpawimawh tur tak hi kan ngaipawimawh tawk lo a ni.

A chipchiar chuan kan luhchilh hman vek lo naa kan sawi zau thawkhat viau mai. Mizo pi pu te hunlai atanga Kristian kan nih chhoh lai te leh tun hun thlengin kan han thlir thuak thuak a. Faina leh thianghlimna kan ngaihpawimawh dan hian duhthu a la sam lo tih hi a lang thei a ni. Chuvang tak chuan kan pi pu te thurochhiah leh an nunmawi te, Kristian nundan tha leh zirtirna te hi a nghahchhan lungphumah hmangin, ngaihthuahna thar leh tihdan thar nen faina hi i ngaipawimawh hle teh ang u.

(He thu hi Dt. 2.7.2018-a All India Radio program, ‘Swachh Bharat campaign’ puala ka thusawi a ni)