Kum 2015, February ni 26 a ni. Zing dar 5:30 ah ka tho a, dar 5:50 ah Durtlang aṭangin Bazara Champhai zing sumo chhuak nan hman tumin scooty-in chak takin ka tlan phei a. Motor a la thawl deuh a, ka tlanchak viau.
Chaltlang chho Transport gate bul ka thlen chhoh laiin ka phone a lo ri a, sumo driver nen kan inbia a, hmanhmawh deuh turin mi rawn hrilh a. Phone ka dah a, dar 6:12 a ni.
Kal leh mai tuma scooty ka tihnun lâi takin pa pakhat, kum 50 bawr vel, bag lian vak lo ak hian mi rawn pan hlawk hlawk a, thaw huam huam chung hian,
“MST bus i lo hmu em?”
Kei chuan, “aw…MST bus pakhat chu Bawngkawnah ka tâwk” ka ti a.
A hawi kual a, mangang angreng tak hian, “min umpui thei ang em?” a ti a.
Teh ngawt chuan. Ka thin a rim lek lek a. Patling ve pui si zak lo ka ti ru angreng hle.
“Champhai zing sumo chhuak ka nan hman a ngai a, ka hmanhmawh khawp a sin” ka chhâng bung viau mai.
A ngawi reng a, a hawi kual vut vut a.
Kei chuan “taxi la mai la” ka ti a.
Min chhâng lo, a la ngawi reng a.
Ka khawngaih deuh ta a, “lo kal rawh ka ti a” ka hnungah chuan rang takin a lo chuang a. “khawilamah nge kal tur” ka ti a.
“Mimbung kal tur ka nia, Zemabawk lamah a nih chu” a ti a.
Hmanhmawh takin Zemabawk lam pan chuan ka tlanpui ta a. Dik tak chuan ka hmanhmawh ve tho avangin ka lungawi vak lo, tlan pah chuan ka hau mawlh mawlh a,
“Zin dawn te chuan tlai lo turin thawh hma mai tur a nia, a ṭul chuan alarm clock te pawh set mai tur a lawm” ka ti a.
“Phone ka nei lo a, sana ka bun bawk si lo alawm mawle” a ti a.
“Thurualpui rawn phone tur che i nei lo em ni?” ka ti leh a.
“Nei lo” a ti a. keipawh chuan ka zawt thui duh ta vak lo a.
Chak takin kan tlan phei zel a, Zemabawk veng hmawr ṭawngṭaina bulah MST bus chu kan va umpha ta a. Horn ka hmet ri vak vak a, driver chuan side glass aṭangin mi rawn hmu a, a thlang deuh kawngsirah chuan a ding ta a. Kan zu thleng thla a, bus conductor niawm tak chu nui sûng chung hian a lo chhuk a,
“In tlai a ni maw” a ti a.
Kei chuan, “nia maw le, hei in la thleng thui hman lo hlauh a, a tihzia e” ka ti a.
Bus conductor chuan, “lo kal rawh u” a ti a.
Ka mi phurh pa chu bus-a lawn ta mai lo chuan inthup tum tak hian saisira ding chungin a wallet a phawrh a. Ka va hmu phak a, engzah chiah nge a neih chu ka hre lo nangin pawisa tam a ak lo tawp mai. Cheng sawmnga a la chhuak a, mi pek a tum a. Kei chuan,
“Ka la dawn lo reng reng” ka ti a.
Inthiamlo deuh hian, “pawisa ka nei vak lo a” a ti a.
“Ka puihna che a ni mai, ngaihṭha takin tluang takin kal rawh” ka ti a.
Hamhaih angreng deuh hian pawisa chu a ak leh a. Bus-a a lawn tur chu a rawn inher a, a hmel chu ka va en a, a hmelah chuan lawm hmel leh keimah avanga inthiamlo hmel chu ka va hmu a.
Bus chu a kal ta a. Kei pawh hmanhmawh takin ka lêt leh a, motor a lo tam deuh tawh a, a tlanchak theih ta vak loh a.
Red rose phei ka tlan lai chuan ka mi phurh pa chu ka ngaihtuahnaah a lo lut a. Bus ka va umpui hram chu ka lawm hle mai. Midangin min mamawh lai taka ṭanpui theia ka awm chu ka lawm lutuk a, ka mittui a tla hial mai.
Engtiang taka pawimawha zin tur nge a nih ka hre lo a, hming leh veng tak ngial pawh kan lo inzawt lo. Kha hun tawi te kha ka tan insenso thlawnna leh ka inruahmanna ti sukuk vek thei a nih laiin a tan chuan vanneihna mak tak a ni ngei ang. Ka tâna chânna chu a tân malsawmna a ni ngei ang tih te ka ngaihtuah a, bus chu ka umpui lo ang tih te ka hlau leh hnuhnawh ta a.
Keipawh chu chunglamin mi rawn chinfel sak mai. Bawngkawn ka thleng phei chiah a, ka phone a lo ri a, sumo driver-in mi rawn phone a, Greenwood Hospital bulah tih tur a neih thu leh min lo nghah thu mi rawn hrilh a. Ka pan chho a, a zing chhuak nan hman loh ka hlauh em em laiin awlsam zawkin ka tihtur chu ka tifel ta a.
Pathianin midang ṭanpui tur leh midang ṭawngṭai chhânna ni turin tun hun kher hi min pe fo. Chuvangin midang ṭanpuina remchang i hmu a nih chuan nghak suh, ti nghal rawh. Thil dang chu Pathianin a chingfel mai ang, hmanrua a ngah lutuk.
Comments