Zoram Thar : Utopia? (Ka Lungkham II)

Dt. 19.2.2016 chhuak chanchinbu hrang hrangah khan ‘Zoram Thar Pawl’ din a nih thu kha kan hmu hlawm ang a. Ka ha hawlh zawng tak a nih bakah, hun engemawti chen atanga mahni phak tawka ka lo ngaihtuah ve thin a ni. Han faksel chiamna hun a la ni lo, chu chu ka tum lo. Pathian tihna leh ram tana thahnemngaihna tak tak nen a kal chho zel turah ngai ang. ‘Zoram Thar’ hi kan beisei ngam tur a ni a, beiseina nung leh beiseina dik erawh a pawimawh.

Utopia: Idealistic nge Realistic?

British pachal Sir Thomas Moore lehkhabu hmingthang, Kum 1516-a latin tawnga a tihchhuah hmasak zet kha a bu hmingah ‘Utopia’ a vuah a. He ‘duhthusam suangtuah ram’ chanchin hi internet lama ka bih thuak thuak bak chu a bupui pawh ka la bihchet thuk lem lo, chuvangin han chulnel hmasa uk loa a hming han lam pawh chu ka inthlahrung angreng.

‘Utopia’ tih thumal hrim hrim hi chu Bible ziakna tawng Greek thumal pathum ‘ou’ mizotawnga ‘awm lo/ni lo’ tih te, ‘topos’ mizotawnga ‘hmun’ tih leh, hmun hming sawi nana an belh (suffix) thin ‘ia’ tih chherkhawm a ni a, ‘outopia’ tih chu ‘utopia’ tia Latinized zui tak mai a ni. Tichuan ‘utopia’ chu ‘a tak awmlo hmun’ tihna a nih hmel. Mahse Pu Moore-a lehkhabu chhungthu leh kan sawi tum te thlir tel chungin, thudang nena thuam mawi deuhin, ‘utopia’ chu  ‘duhthusam suangtuah ram’ tiin kan dah thei ang chu maw? Hei hi thumal hrilhfiahna bu lam pawhin min phalsak niin a lang.

Tuipui zaua khualzin lawng atanga lunghlu paih thlir liam ringawt ai chuan, mitthla takngial pawh a thamral loh tlat chuan a hlu zawk lo em ni? Lawng chu a khalhtuin a khalh a ngai; a khalhtu a fimkhur deuh leh lawng a muangchang deuh mai a, mahse kal kal ta na na na chu a tum ram a thleng mai thin. Tih tak takah chuan Canadian theologian Gregory Baum leh German Marxist philosopher Ernst Bloch te pawhin ‘a thu chauh utopia’ atangin ‘a tak ram utopia’ an lo thliar hrang ve tho a. Gothenburg University-a Professor emeritus Bjorn Hettne pawhin ‘a tak tak ni thei utopia’ a lo sawi ve tho. Mumang (dream) pawh hi tih puitlin tuma mi a phet a phet tlat chuan hlawhtling tura hmathlir tha (realistic vision) ah a chang daih thei ve tho.

Ram Thar: Hnamte beisei?

            Khawvela hnam hrang hrang chanchin inthial chho kara kan hmuh hmaih theih hauh loh chu, ‘ram thar tha zawk beiseina’ hi a ni. Chu chuan sakhaw nunah pawh nghawng a nei nasa khawp mai. Tin, Philosopher/thinker ropui tak takte ngaihtuahna kaptu pawh hei bawk hi a ni. Chung ngaihtuahnate chu vawiin thlenga khawvel politics nghahchhan lungphum an ni zui zel ta hlawm bawk.

            Bible atangin - Judate chanchin hi ‘ram thar/tiam’ beiseina nena intan a ni kan ti thei ang. Abrahama chu Pathianin ‘ram a la entir tur’ lama tirhchhuah a ni a. Aigupta saltanna pawh tampui mitthi kara ‘ei bar zawnna mumal zawk’ um vang a ni pakhat. Aigupta saltang chhuahna leh ‘ram tiam’ beiseina te phei chu Liberation Theology nghahchhan a lo ni ta hial a. Ram tiamah an han inbengbel a, an duh ang takin Lal an han nei a. Lalte pawh chu an lo famkim bik lo, chu chuan Messia beiseina an rawn siam tan a ni. Kum zabi 8-naah phei kha chuan he beiseina hi a sang tawh hle. Israel lalram a lo tluchhia a, Babulon saltanna atang leh hruai darh an nihna hmun tinreng atanga an beiseina chu ‘ram dinthar lehna’ a ni. Tisa leh thlaraua chhanchhuaktu an beisei laiin Lal Isua a lo lang a, a thupui erawh a thluk a dang deuh, “Pathian ram chu nangmahniah a awm,” “ka lalram chu he leia mi hi a ni lo” tih a ni ta daih mai. Chu chu nimahse a rawngbawl bultannaah, Nazareth khuaa a manifesto puanchhuah leh a ministry pumpui han thlir hian, Pathian fapa engkimtithei a nihna chuan lei leh van a fan chhuak a ni. Hemi awmzia chu; vantlang nun nuam, Pathian thlarau chenchilh, inngaihsak tawnna, dinhmun hniam zawkte chawikan, hmasawnna khairual a awm theih nan theihtawpin a bei a, tisa leh thlarau chhanchhuaktu a nihna a hlenchhuak a ni.

            History atangin - Khawvel hian ‘Ram Tha zawk’ a beisei reng a ni. Chu chu a hunlai mil zelin philosopher/thinker-ten ram inrelbawlna felfai zawk leh, chumi atana an duhthusam puanchhuahna lehkhabu leh theory lo piang ta zawt zawt hian a tichiang hle a ni. Entirnan:- Plato, Republic (380 BC) leh Thomas Moore, Utopia (AD 1516) te. Tin, enlightenment hunlaia social contract theory hnungzui ringawt pawh tihtham fe kan hmu chho a ni. E.g. Hugo Grotius, On the Law of War and Peace (1625); Thomas Hobbes, Leviathan (1651); John Locke, Second Treatise of Government (1689); J.J. Rousseau, Du Contract Social (1762); Pierre-Joseph Proudhon, Individualist Social Contract (1851); John Rawls, Theory of Justice (1971); David Gauthier, Morals By Agreement (1986); Philip Pettit, Republicanism: A Theory of Freedom and Government (1997).

Heng bakah hian theory dang zui tam tak a la awm bawk a, entirnan: Adam Smith-a Wealth of Nations (1776) te, Karl Marx-a Communist Manifesto (1848) leh Das Capital (Vol. I in 1871) te pawh hi an ni thei ang. Heng ngaihtuahna behchhan hian India ram hruaitu hmasate pawhin ‘New India’ suangtuahna an lo nei chho ta zel a ni. Pu Gandhi-a Sarvodaya (welfare of all) leh Nehruvian socialism te phei chu kan la khel tui hle a nih hi. Tin, a tunlai deuhah chuan, fam ta A.P.J Abdul Kalam-a lehkhabute leh Chetan Bhagat-a lehkhabu thenkhatte hi ‘Ram Thar suangtuahna hlimthla’ (visionary document) tia chhal theih ni bawkin ka hria. Mizo kutchhuak, visionary document tia sawi theih kan nei nual bawk a, tuna ka banphak mai te chu: K. Sapdanga ziak, Zoramah Khua a Var Dawn Em? (2008) leh, Bangalore Mizo Association tihchhuah, Zoram Thar a awm thei ang em? (2011) tih te hi an ni.

Heng kan han sawi tak chiam atangin khawvel hian ‘Ram Thar, tha leh nuam zawk’ kan beisei a ni tih a tilang chiang hle mai. Colonialism hun a lo inher chhuak a, ram thar nuam zawk zuanin European-ho khawvel hmun hrang hrangah an pem darh chuah chuah bawk a nih kha. El-Dorado te pawh han sawi zel a chakawm hle mai. Engpawhnise kan sawi tum ber chu, “hnam tinte hian ‘Ram Thar’ kan suangtuah a, kan mangphan a, duhthu kan sam \hin a, chu ram chu neih tumin kan bei thin” tih hi a ni.

 

Zoram Thar: A awm thei ang em?

Pathian thu thiamte duhthusam ram ‘shalomic community/state’ te, Political/Social thinker-te suangtuah ram ‘ideal/welfare state’ hi a awm thei ang em? Chutiang tak ram chu he kan Zoramah hian kan din thei ang em? Zoram Thar a awm thei ang em? A awm thei ang tih kan ring tur a ni. Kan ramin Pathian kan tih takzet chuan chu dinhmun chu a thlen te pawh kan la thleng thei mai ang tih beiseina nung kan nei tlat tur a ni. Chu beiseina chuan a tak tak, thiltiha thawkchhuak tur leh thahnemngai turin hmalamah min nawr lo thei lo ang. Kan ram leilung hausakna pawh kan la haichhuak ang a, hmasawnna ruhrel changtlung kan nei chho ang a, mihring khawsak leh eibar zawnna kawngah pawh kan la intodelh theih kan beisei tur a ni dawn lawm ni? Chu dinhmun chu kan thleng ta mai ta lo a nih pawhin a lam pana kan kalkawngah a hlawkna ‘advance-in’ kan tel ngei ngei ang.

Miin Mizoram CM nih tum tlat ta se MLA atana thlan tlin hun chu a awm ngei ang. Tlangvalin nula hnenah ‘I tan chuan siar lak ka huam’ a tih hian arsi tak tak a la dawn lo tih chu a chiang, mahse nula tana tlangval inhuamna chuan thil tam tak a tih tir thei thung ang. Kan rah chin apiang kan ram a nih dawn chuan a pena penchhuak hlek loin eng ram mah kan chang dawn lo a nih chu. Chuvangin, mipuiten kal i siam ang aw le. Ram kal siamna kawnga ka tihtur dik tak tih hi, a Kristian ang zawng tak pawhin he kum zabi 21-naah hian kan hnapui ber pakhat a nih a ngai hial tawh e.

Zoram Thar: Engtinnge kan beisei ang?

‘Zoram Thar’ hi thuthluanga nghah chi niin a lang lo. Mak danglam deuh takin Pathianin hna a thawk ang a, he dinhmun hi awlsam angreng deuha thlen mai tur chi a ni lo tih hi kan hriat a pawimawh. Harsatna leh ke pen ti khawlhkham thei tam tak kalkawngah a awm tih hriat a tha. Thil tha zawk nei tur chuan kan tih pangngai leta tha kan tih a ngai. Chumi atana tul chu kan hriat sa dikna, rinawmna leh taihmakna te hi an ni. Kan nunkawng leh hnathawhna hmun tinrengah, hriat belh vak aiin kan hriat sa nunchhuahpui hi kan hmabak lian tak a ni.

Beiseina nung leh beisei dan dik kan neih a ngai bawk. “Zoram Tharah chuan kan buh vui te chu sakawr mei tiat tiat an ni ang” han tih ngawt te hi a dik lo. Tin, changkang thut tura inngaihna te, hmasawn nghal zawt tura inngaihna te, leilung tha sawt tura ngaihna te, thlai tha pui pui thar nghal ringawt tura inngaihna te, Mizoram lo nuam ta thut tura ngaihna te, sualna bo ta duak tura ngaihna te, zai leh lama hlim hut hut reng tura inngaihna te hi ‘Zoram Thar, tha leh nuam zawk’ beisei dan tur a ni lo. Ram Thar, Pathian telna leh A lungawina chu thawhchhuah tur a ni a, a chena chen tur niloin. Tin, chu dinhmun vawnghim tura beihzui zel leh thawh chhunzawm zel pawh ‘Ram Thar’ neitute mawhphurhna tur a ni ang. Chutiang nilo beiseina lemlawi (abstract) lutuk chu theological leh moral judgment pek theih pawh a ni lo hrim hrim mai.

“I ram lo thleng rawh se” kan ti a, nitin kain kan sawi, thinlung leh nungchang chuan a sawi lem hlei lo. Pathian lalberna ‘Zoram Thar’ tundin chu kan ngam tak tak em? kan duh tak tak em? Dikna leh felnaa khat Pathian chuan, he ramah hian A ram hi rawn tungding ta tak tak se chuan zo lo fe fe hi chu kan awm nuk lawng maw? Leo Tolstoy-a thawnthu chuan, ‘Pathian chuan thudik a hmu reng a, mahse a nghak thin’ a ti. Kan insiamtha duh lo a nih chuan kan thiltih rul tura Pathian chet hunah engtinnge kan awm ang? Israel fate khan harsatna tam tak paltlangin ‘Ram Tiam’ an lut a. Japanese theologian Kosuke Koyama chhut danin, Kanan ram pana Pathian hruaina kawngah khan darkar khata mel thum zel kal ang an ni. An muang khawp mai, mahse an thleng, hmalam an pan miau a ni.

Lal Isua hi taksa leh thlarau chhhandamtu a ni a, chhandamna famkim min pe. Chu chu lei leh van huapzo a ni a, ama nihna dik tak pawh a ni. Kan duh chin kan pawm ngawt hian Isua nihna a tidanglam eih lo. Zofaten thlarau mi kan hrilhfiah dan te hi ennawn a ngai. Thil pahnih (dichotomy), van-lei (heaven-earth), thianghlim-khawvel (sacred-secular), physical-spiritual (taksa-thlarau) inrem theilo leh kaldun thei lo nia kan ngaihna te hi tih bo a ngai. German theologian Jurgen Moltmann-a chuan, hun hnuhnung thu leh Kristian-te beiseina la kawpin “…chu chuan hmalam ena hmalam pan zel leh chumi avanga tun hun pawh tihdanglama siamthat zel…” thu a sawi a. Kohhran-te pawhin kan tihdan thin pangngai piahlamah, rahbi thar tukin aw kan chhuah dawn lawm ni?

‘Zoram Thar’ hi khawi atangin nge kan neih ang? Social-political-religious hi thil hran ni loin thil pakhat a nih a ngai. Chuti nise tunge a meichher keng dawn? Sawrkar nge Kohhran? Party hlui nge Party thar? Kan tel ve dawn nge ralkhat atangin kan thlir dawn? Engtianginnge he ram hi thangtharte kutah kan hlan chhawn dawn le? Heng chhannate hi tunah kan nei hrih lo, min nawr kaltuin a hril ang chu.

Chanchinthar lamah US President thlan tur vuakvet boruak kan hre ngun hle mai. Barack Obama hian ‘change, we can believe in’ tih a lo hlawhtlin pui tawh a. Tunah hian Republican pa thawmna Donald Trump chuan ‘make America great again’ a rawn ti ve leh ta. ‘Zoram Thar’ beiseina hi, atthlak mai mai tiin kan hnawl hmak dawn nge? ‘Ram Thar’ siam tura penchhuakin, kan auchhuak ve zawk dawn le?