Ka Lungkham - I

A lungkham leh ka lungkham

‘Ka Lungkham’ tih lehkhabu khan Mizo mipui nawlpuite hnena Mizo thu leh hla kalphung hmelhriattirna leh finchhuahna, a ziaktu Pu B. Lalthangliana lungkham a puahchhuahpui a ni ber mai a. He lehkhabu hi Mizo Academy of Letters ‘Book of the Year’ hmasa ber atan kum 1989 khan thlan a ni nghe nghe.

Pu B. Lalthangliana hi kumin (2015) June ni 20 khan a chenna in Chhinga Vengah ka zuk tlawh a. A hun chep tak karah darkar 1 vel lai kan inkawm chhungin, ‘hnam nunzia leh thlaraumina,’ ‘Kelkang harhna atanga mizo tawng ziak dan,’ ‘thingpui hang leh Biak In’ tih vel thu inkarkik tak tak kan sawi dun a. ‘A tak thla’ kan lak dun mai bakah a ‘masterpiece’ tia ka vuah fiam sak, a lehkhabu ‘India, Burma leh Bangladesh-a Mizo Chanchin’ tih kha discount fetin mi lo leitir bawk a. Ka lungkham lenchhan ber, ‘Mizo chanchin leh Pathian thu zirna phuar belhbawm’ chungchang erawh sawi tur kan ngahdun luatah kan chip nawi hman ta lo. Tin, thu hnuhnung zawk hi a feh kawng lam a nih lemloh avanga inthlahrungin a hnuhhram ham luih chiam duhlo bawkin ka hria.

Ka lungkham: utopia?

British pachal, Roman Catholic hoin mi thianghlima an ngaih zui tak Sir Thomas Moore lehkhabu hmingthang, Kum 1516-a latin \awnga an tihchhuah hmasak zet kha a bu hmingah ‘Utopia’ a vuah a. He ‘duhthusam suangtuah ram’ chanchin hi internet lama ka bih thuak thuak bak chu a bupui pawh ka la bihchet lem lo. Chuvangin han chulnel viau hmasa uk loa a hming han lam pawh chu ka inthlahrung angreng.

‘Utopia’ tih thumal hrim hrim hi chu Bible ziakna tawng vohbik Greek thumal pathum ‘ou’ mizotawnga ‘awm lo/ni lo’ tih te, ‘topos’ mizotawnga ‘hmun’ tih leh, hmun hming sawi nana an belh (suffix) thin ‘ia’ tih chherkhawm a ni a, ‘outopia’ tih chu ‘utopia’ tia Latinized zui tak mai a ni. Tichuan ‘utopia’ chu ‘a tak awm lo hmun’ tihna a nih hmel. Mahse Pu Moore-a lehkhabu chhungthu leh kan sawi tum te thlir tel chungin, thudangte nena thuam mawi deuhin, ‘utopia’ chu  ‘duhthusam suangtuah ram’ tiin kan dah thei ang chu maw? Hei hi thumal hrilhfiahna bu lam pawhin min phalsak niin a lang.

Pathian thu zirnaah hian ka la thleng thuk lo hle mai, mahse han inhnimphum takah chuan ‘lungkham’ ka nei ve miau a, chu chu a tha ber tia chhal pawh ka ngam chuang lo. A tak ram a chang thei ang em pawh ka hre lo, hunin a la rawn hril ang chu. Mahse up tawih ngawt ai chuan hmuhnawm tih vang hrim pawha kalpaha han thlek ve zawkte an lo awm mial takin ka han thet ve hmiah mai dawn a ni. Enge…tuipui zaua lawng atanga lunghlu paih thlir liam ai chuan mitthla takngial pawh a thamral loh tlat chuan le!  

Lawng chu a khalhtuin a khalh a ngai. A khalhtu a fimkhur deuh leh lawng a muangchang deuh mai a, mahse kal kal ta na na na chu a tum ram a thleng mai thin. Tih tak emah chuan Canadian theologian Gregory Baum leh German Marxist philosopher Ernst Bloch te pawhin ‘a thu chauh utopia’ atangin ‘a tak ram utopia’ an lo thliar hrang ve tho a. Gothenburg university-a professor emeritus Bjorn Hettne pawhin ‘a tak chang thei utopia’ a lo sawi ve tho a lawm le. Mumang (dream) mai mai pawh hi tih puitlin tuma mi a phet a phet tlat chuan hlawhtling tura hmathlir \ha (realistic vision) ah a chang daih thei ve tho asin.

Ka lungkham Pathian thu zirna?

            A bung mal leh thu hlawm then hran te te nena thetdarh fai vek tur chuan he lehkhabua kan hmun leh hun neihin a remti chiah lo a. Chuvangin tun tumah chuan a funna kan phelh ang a, kan chhawp tawp phawt mai dawn a ni.

            - Aizawl Theological College hi mahnia ro in rel leh mahni chunga thuneihna tawp nei theological university hmunpui a lo ni dawn ta a, a hming pawh university hmingpu-a siam\ha\ a ni ang. Tichuan helai tlangsang hi a laia hmangin kan hnaivai leh hlat deuha secular leh christian university-te kan thawhpui ang a. Tin, university grant commission lamah iptepui ban dan kan ngaihtuah bawk ang.

- Senate of Serampore College (University) leh a hnuaia college dang 57 velte nena kan inzawmna siamtha sauh sauh chungin Asia Theological Association lam te pawh kan hawi ang. A tul dan azirin kum zabi 21-naa Kristian pun chhoh chakna bial lam hawiin ‘act east policy’ kan kalpui ang a. Tichuan south-east Asia leh far-east Asia ah kan tawlh lut chho zel ang.

- Hei hian khawthlang lam kan hawina a dal dawn chuang lo. West Asia-ah a ram puma ‘Bible library,’ Israel ramah thawhpui kan nei ang a. Chuta\ang chuan Abrahama koh chhuahna lamlian, exodus kawng\um, saltanna lamtluangpui leh Mediterranean Bible ram khawvel kan dai dar thei tawh ang.

- Postcolonial thlirna atanga western ideology kan chik hle rualin, zirna lamah pawh khawthlang lehzual ram changkang university-te nen leilawn kan dawh zawm ang a. Kan faculty thenkhatte luhthlak fo tawhna Europe leh north America lamah a theih angin zirna kawng kan zawh ang. Chu penchhuahna leh daidarna chuan lehkhabuin min pek hriatna bakah chianna min pe dawn a ni.

- Kan university chu autonomous authority nei leh university engemawzat zawmpuia thawhpui nei a nih dawn avangin India ram khawpui ber Delhi-ah mission board lam nena tangtlangin college kan hawng ang a. Pathian thu zirna leh mission strategy mumal takin kan duang ang a, kan kaldun tir ang.

- Presbyterian Church of India hnuaia synod dangte, India ramril lam leh hmarchhaka kohhran pawl dangte leh Myanmar lama theological college, kan university course leh degree la ve duh te chu an dinhmun azirin affiliation kan pe mai ang.

- Aizawl Theological College, Missionary Training College, Presbyterian Hindi Bible School, Presbyterian Bible School leh Mobile Theological School / Lay Theological Education te chu dean/rector/principal hrang hnuaiah kan dah ang a, mahse hmunkhat atangin vice/chancellor-in a khaikhawm ang. Chunglamin rem a tih chuan hlamzuih tawh synod college tharthawh dan kan zawng bawk ang, a chhan chu hei hian secular university thlunzawm kawngah kawng a sial theiin a rinawm.

- Zirna lam pawh kan hnam nun te, India rama hnam nunze hrang tam tak mai bakah foreign lamte pawh ngaihtuah chungin duhthlan tur course kan siam ang a. Tawng chi thum heng english, hindi leh mizo tala degree puitling lak theih dan tur kan duang ang. Mizo zirlaite course thlan tur bikah chuan kan hnam chanchin, vantlang nunphung leh sakhuana inlumleh dan chiang takin kan chhawpchhuak bawk ang.

- Zirchianna lam pawh tichangtlung chho zelin research centre rintlak tak siam kan tum ang a, hemi atan hian field work leh empirical study lam kan tichak ang.

* Exam system tibo chuang loin mihring thiamna luhchhuah leh phawrhchhuak zawngin hriattamna, hriatthiamna leh hriatchhianna tinzawnin zirna system kan kalpui ang a, subject matter close discussion leh seminar kan uar ang.

* Graduate level-ah zirlaite academic knowhow tihchak nan leh an general awareness atan subject tlanglawn basic knowledge tal kan chhawpchhuak ang.

* Kan university atanga master level zo a duh apiangte tana in enroll-na tur academic performance index scheme kan siam ang a. Master degree zo tawh, doctoral research chhunzawm lo te chu an ministry leh academic performance atangin kum 5 vel chhung chu academic yearly rating kan pe ang.

* Kan thatna sa, academic discipline leh ministerial practice inbuktawk tak hi kan ngaipawimawh chhunzawm zel bawk ang.

* Kan university chuan internal course engemawzah a kalpui mup mup rualin distance course hrang hrang a kalpui reng tho bawk ang.

- Zirlai te chu academic year tawp apiangin human resource development, career & placement cell lamin an lo ‘brush up’ ang a. Zirlai thiamna leh tuina milin an kalna awm tur, academic, mission, pastoral leh thildangah, ram chhung leh ram pawn lam thlengin kawng a lo zawnpui ang. Hei hian kan synod hnuai pastoral ministry-ah leng chiah loa kan inhnawhkhawm hi a tiziaawm thei ang.

- Heng thil zawng zawng ti tur hian mihring chuan lo daih pawh ni ila sum tam tak a ngai a. Engtinnge kan tih tak ang? Synod kan nghenchhan bakah hian sum luhna dang kan zawn belh a ngai dawn tih a chiang e.

- Hmaih theih hauhloh pawimawh ber mai bawk si chu thlarau lam inbuatsaihna a ni. Pathian kohhran enkawlna leh Pathian thu zirna anih miau avangin uluk taka ngaihtuahin, Pathian rawn chung zelin zirna leh hmasawnna pawh kalpui a ni ang a. Chutiang tak tur chuan thuthlukna pawh felfai taka siam kan tum ang.

A tawpnan: ka lungkham Zoramthar?

Political leh social thinker te duhthusam suangtuah ram ‘ideal and welfare state’ hi a awm thei ang em? Zoramthar a awm thei ang em? A awm thei ang tih ka ring. Kan ramin Pathian kan tih takzet chuan a thlen te pawh kan la thleng thei thuai mai ang tih beiseina nung ka nei ve tlat pek a. Kan ram leilung hausakna pawh chutih hunah chuan kan la haichhuakin ka ring. Hmasawnna ruhrel changtlung kan nei ang a, mihring khawsak leh eibar zawnna kawngah pawh kan la intodelh theih ka beisei. Kan thleng mai ta lo a nih pawhin chulam pana kan kalkawngah a hlawkna ‘advance-in’ kan tel ngei ngei ang.

Miin Mizoram CM nih tum tlat ta se MLA atana thlan tlin hun chu a awm ngei ang. Hman deuh khan kan CM hlui pakhat chuan police constable atanga director general of police a nih theih thu a sawi a. A hunlai kha chuan kan nui mai a, mahse kawng awmlo zawng a ni lo e. Tlangvalin nula hnenah ‘I tan chuan siar lak ka huam’ a tih hian arsi tak tak a la dawn lo tih chu a chiang, mahse nula tana tlangval inhuamna chuan thil tam tak a tih tir thei thung ang.

Kan rah chin apiang kan ram a nih dawn chuan a pena penchhuak hlek loin eng ram mah kan chang dawn lo a nih chu. Chuvangin, kohhranho-ten kal i siam ang aw. Hei hi kum zabi 21-naa kan hnapui ber pakhat a nih pawh a ngai hial tawh e.

                                              
* From the 36th Annual Magazine of Aizawl Theological College (2015)