Kan hriat theuh angin India ram hian chhinchhiahna
bik engemawzat a nei a, chungte chu India ram nena inkungkaihna nghet tak nei an
ni hlawm. Heng chhinchhiahna thenkhat leh hindu sakhua inzawm dan hi kan
ngaihtuah tam lutuk loh lam a ni maithei. Tin, tun hnaiah national book atana
hindu sakhaw lehkhabu thianghlim pakhat- bhagavad gita rawtna chungchangah
boruak a sang hle a, chiang zawka thlir ve a tha awm e.
Indus
luikam vela civilization lo intan chhoh hunlai (c. 2000-1700 BC) vel atang daih
tawh khan hindu sakhua (ni theia ngaih) leh mipuite nunphung rawn inher chho
zel hi lakhran hleihtheih loh khawpin a inbelhbawm a. Chu chu India rama
aryan-ho rawn luh, vedic hunlai (c. 1500-1200 BC) vel khan sawhngheh a lo ni ta
a (D.N. Jha, 1977). Tichuan India mipui tam zawkte culture chu hindu sakhua
nena kut insuih tlatin a rawn inmung chho ta zel a ni. Hindu scholar tam tak
chuan, “hinduism hi sakhua a ni ngawt lo a, Indian culture a ni ber e” an ti thin.
Chutiang chu a nih avangin India rama political party leh pawl engemawzat
chhinchhiahna hi hinduism nena inzawm tlat an ni. India ram pawh ‘sovereign
secular socialist democratic republic’ ni mah se ram chhinchhiahna thenkhat chu
hindu sakhua nena inzawm tlat an ni bawk.
National tree, hmawng kung (banyan tree/ficus
bengalensis) hi hindu ho thing thianghlim a ni a, a hnahah hian an pathian
krishna chu a chawl hahdam thin niin an ngai. Bhagavad gita 15:1 ah chuan, “mi
tupawh he thing hria chuan veda a hria a ni” tih a ni a. Hindu hoin hmawng kung
an ngaihpawimawhzia hi phaia zin te chuan kan hmu fo ang.
National flower,
lotus pangpar (padma/nelumbo nucifera) hi hindu ho chuan an pathian vishnu lai
(navel) atanga rawn chhuak niin an ngai. He pangpar hi an pathiante mawina leh
duhawmna entirtu niin an ngai a, an pathian thenkhat; brahma, lakshmi leh
saraswati te nena inzawmna thuk tak a nei bawk. Tin, lotus hi BJP symbol a ni.
National river,
Ganges lui hi hindu ho lui thianghlim a ni a. An pathiannu (personified) ganga
a ni bawk. He luia inbual hian sual ngaihdamna leh moksha (thihna leh pian
nawnna ata zalenna) chang theiin an in ngai a, kumb mela velah pawh an inbual
chiam zel hi. Ganges lui hi tuna central sawrkar hian a ngai pawimawh hle a, a
thenfai hna thawkin chu chu kum 2018 ah chuan zawh hman a tum. Ganga
rejuvenation chu water resources leh river development te nen ministry pakhatah
dahin senior cabinet minister Uma Bharati leh MoS Prof. Sanwar Lal Jat ten an
enkawl mek a ni.
India
ram chhinchhiahna siamfeltu te khan hetiang tak hi kawhtir an tum em ka hre lo
a, mahse tinzawn theih tak chu ani ngei e.
National book atan Bhagavad gita? Kum
2014 september thlaa PM Modi’n US a zuk tlawh khan he lehkhabu hi President
Obama a lo present tawh a ni. December ni 7, 2014 khan RSS hnuaia in affiliate
pawl pakhat, Global Inspiration and Enlightenment Organization of Gita
(GIEOGITA) huaihawtin Delhi-a Red fort maidan-ah bhagavad gita kum 5151 tlin
lawmna, gita prerna mahotsav neih a ni a, India rama foreign embassy 20
aiawhten an hmanpui bawk. He hunah hian external affairs minister, Sushma
Swaraj chuan bahagavad gita chu national book (rashtriya granth) ah puan a rawt
a, hemi atan hian thil tul tihfel ngai tlemte chauh awm tawh niin a sawi a. Bhagavad
gita vang chauha chona hmachhawn thei niin a insawi a, psychitrist te pawh
depression vei damlo enkawl nana chhiar thin turin a fuih a, mitinte nitin
chang 2 tal chhiar theuh turin a rawn bawk. A thusawi hi VHP hotupa Ashok
Singhal leh Haryana CM Manohar Lal Khattar ten an thlawp nghal a, “bhagavad
gita hi constitution chunga awm a ni a, PM hian national book atan a puangfel
thuai tur a ni” an lo ti bawk.
Bhagavad
gita chu enge? Hindu sakhua hian lehkhabu thianghlim
engemawzat a nei a, chungte chu pahnih- sruti (thil a hriata hriat) leh smriti
(thil hriatreng/rilrua cham) ah then a ni,. Sruti chu veda bu pali (rig, sama,
yajur, atharva) te an ni a. Smriti chu sruti nilo zawng an ni a, a langsar
zualte chu ramayana, mahabharata leh purana te an ni. Bhagavad gita chu Lal
hla/Lord’s song tihna a ni ber a, mahabharata thawnthu vawrtawp (climax) a ni.
Pawmdan tlanglawnah chuan kum zabi 2-na BC lai vela hindu puithiam hriatna sang
bik nei Vyasa ziakkhawm (compile) a ni. A bu pum hi bung 18-a then a ni a, a
vaiin chang (shlokas) 700 a awm. Bung 1-na tihloh hi chuan yoga lam a hawi vek.
Mahabharata
thawnthuah chuan thlah khat, pandava unau leh kaurava unau hote lalram
chungchanga inhmuthiamloin an indo a. Pandava unau lam mi Arjuna chu indona
field-ah a rilru a buai hle a, a chhan chu tha tak pawh lo nise mahni unaute
thisen chhuah chu dik theiin a hre lo. Tichuan, hindu pathian krishna chu
mihringah lo changin Arjuna indo tawlailirah a rawn chuang ve a, Arjuna chu a
counselling ta a ni. Arjuna hian a hriatthiamlohte a lo zawtfiah bawk a, heta
an inchhanna dialogical sermon lakchhuah hlawmkhata dah chu bhagavad gita hi a
ni. Krishna chuan Arjuna chu mihring dinhmun azira tih tur (duty/dharma) dik, a
bawhzui dan tur, buaina thlirdan tur leh a hmachhawn dan, hriatna leh chetzia
thunun dan, mihring nun kawng hrang hrang te a zirtir a ni. Tin, krishna chungchang,
pathian mihringa lo channa (avatar) leh hindu sakhuain khawvel a thlirdan te a
langsar bawk.
A
nghawng a na: Sushma Swaraj rawtna hian India ram
media leh politics a luah khat nghal a, kum 2014 parliament thlasik thutkhawm
pawh he issue avang hian an ri laih laih a nih kha. Sakhaw dang hruaitute an
auchhuak nghal a, political party thenkhat (INC, TMC, Left, adt.) te pawhin
sawiselin an bengchheng hle. TMC hotunnu Mamata Banerjee chuan India rama
sakhaw hrang hrangte lehkhabu thinghlim hming sawichhuakin chungte chu an zah
vek thu a sawi ve hial a ni.
National
book atana bhagavad gita duh leh duh loh campaign-na hi social network site
(facebook & whatsapp) lamah a darh chak hle a. Ka awmna group engemawzatah
he campaign message leh voting option hi midangin an rawn fo post thin a, vawi
khat chu a duhlo lamah ka vote ve nghe nghe kha.
Ka
ngaihtuah zui tak chu: India ram chu sakhaw tihbik nei lo
ram a ni a, khua leh tui kan nihna angin kan ngaihdan te sawithei turin dikna
kan nei a, sakhaw mal lehkhabu national book atana duhloh chu thil awmlo pawh a
ni lo. Amaherawhchu he issue avanga Mizo Kristiante kan phu deuh dual niawma
lang hi a eng chu kan hria nimaw ka ti, kan chiai hma lutuk thin a ni. Kan sawi
tak ang khi India ram chhinchhiahna leh hinduism inzawm theih dan a ni. India
mipui tam zawkte culture leh hinduism hi a inngheng tlat a, hei hi a thlirdan
thiam a tha khawp mai. Hman atangin kan ngaihtuah ngai vak lo nge, engah kan
ngai vak lo niin a lang. Tunah social network lamah thu a tam ta deuh a,
insawithaihna leh hrilhlawkna angreng te nena kan ri ta hluai hi chu a holam
deuh a ni. India ram nihna pakhat, ram danpuia chuang sakhaw zalenna hi tun
thlengin pheh thluk em chu a la ni lo nang a, humhalh leh chawisan a tul hle.
Mizoramah BJP unit kan nei a, central
sawrkar pawh thawhpui thiam kan tum hlawm a. Mizo politician thenkhat vir vel
ruai te pawh kan awm a, tlaktlum loh kan hlau hle a ni. Helam kawngah hian khaw
hmuh deuh a tha khawp mai. Central sawrkar chu state sawrkar tan dawr loh
theihloh chu a ni a, mahse kan state hmasawnna leh intodelhna tur lama tanlak a
ngaihzia a tilang chiang hle. Tin, Mizote hi pianzia leh hmel, nundan phung leh
rilru puthmangah pawh kan dang tih hi chu tlang hriat a ni a, kan Indian
hleithei lo pawh hi awm tak a ni. Amaherawhchu tunah chuan Mizoram chu India
ram bung khat a ni tawh. mahnia ro in relna hranpa kan neih mai hmel loh a,
hindu sakhua chungchawi chu lo dah tha hmak ta pawh ni ila, kan Indian thiam ve
deuh te pawh a tul awm e.
Bhagavad
gita hi national book atan central sawrkar hian a puang duh tak tak a nih phawt
chuan campaign vote hian kori a tu vaklo maithei. Party mal pawha nghet taka
sawrkarna siam, India mipui tam zawkte thlawpna leh duhdan hre chiang tak BJP
hian hinduism hi a politicize thiam hle. Tuna union cabinet minister tam zawk
te (PM Modi ngei pawh) leh BJP sawrkarna state CM te hi hindu bel (RSS, VHP,
bajrang dal, adt.) a chhum hmin leh hindutva ideology-a tahhriam vek tawh an la
ni lehnghal a. PM Modi phei chu kum 2002-a Gujarat state-a godhra intualvuakna
velah a lo hminghliau tawh hle a nih kha.
Kum
2001 chhiarpuiah India ram mipui 80.5 % chu hindu an ni a, kum 2011 chhiarpui
khan 79.6 % ah a tlathla a n. Mihring kan pung chak si a, hemi awmzia chu sakhaw
dangho an pung tihna a ni. Hei hi hindu kulmuk ho chuan mutmawh hnarmawhah an
nei a, tun hnaia BJP MP ho tawng chhuah duhdanah a chiang hle. ‘Hindu
hmeichhiaten fa pali aia tlemlo neih tur,’ ‘India ram hi hindustani a ni,’
‘Engtikawng pawhin ayodhya hmunah hian Ram temple sak ani ang,’ ‘India mite chu
eng sakhua bia pawh Rama fate vek kan ni,’ tih vel a ni a, national book issue
lo ri chhuak ta pawh hi a mak vak lo. Tin, Krismas ni tak, december ni 25 chu central
sawrkarin good governance day-ah a puang mauh mai bawk a nih kha.
Kan
Kristianna hi: Tunhnaia kan boruak velah hian kan
engemawti deuh ruai hlawm a, social network lamah pawh insawithaihna leh
hrilhlawkna lem angreng tak tak kan vawrhdarh vak vak a ni. Nun tak lam
ngaipawimawh hauh siloin facebook leh whatsapp status-ah te kan hmang chei
chuai a ni. Thlarau pawl kan duh a, a hruai erawh kan duh lem lo. Pathian thu
kan hril vak hian kan nun a luhchilh tawk lo a, thu takin min chiah hneh lo a
ni ber. Takna leh nghehna nena Kristian nun kawng zawh tur kan nih laiin thlir
fim dawl turin dinna nghet (principle) kan nei lo fo. Nitin nuna Kristianna lak
luh leh kalphung (system & structure) tih-Kristianna lam hi kan tuipui phak
lo (H. Laldintluanga, 2014:43), nge ni kan duh lo zawk? Pathian thu kan sawi huai
huai a, nuna hmuh tur nei khawpa Pathian mi erawh kan tam lo hle. In ti
Kristian tha hle si, hlauh ngah lutuk, hlauh tur zawng leh puh dik tum kan tam
lutuk te hi Rev. Thansiama tawngkam takin, ‘kan pawnlanna thukzia’ lantirna mai
mai a ni.
Pawimawh
ber ta chu Pathian rinna takah nghet takin ding la, inralring leh fimkhur takin
nung la, engemaw hlekah chiai mai mai suh. Pathian pathianzia te hi ngun takin
ngaihtuah la, A thu pawh nun pui tum ang che.
17th January, 2015.
Aizawl.
Comments