Kum 1935-a YMA Din Kha…

Mizorama pawl lian ber, mitin huapzo; a din tirh atanga zofa piangchhuak tawh zawng zawngte pumpelh theih hauh loh khawpa pawl tangkai leh tlawmngai pawl awmchhun tih theih, Young Mizo Association (YMA) chu kum 79 liam ta, kum 1935 June ni 15 khan Kristian Missionary Rev. Lewis Evans kaihhruaina hnuaiah mi tlemtein din a ni a. Ani hi President hmasa ber niin Secretary hmasa berte chu Pasena leh Vankhuma te an ni. Engvanginnge Kristian Missionary Rev. L. Evans kaihhruaina hnuaiah YMA hi  din a ni a? Engvanginnge hetih hunlai khera din a nih? Engtinnge heti taka pawl lian a lo nih theih? I han enchiang dawn teh ang u.

Mizoten vailian vawi 2-na kan tih mai kha kum 1889 atanga tanin, a kum leh 1890-ah British hoin Aizawl an run a, vailian vawi 1-na anglo takin an thut zui nghal a; ram inrelbawlna lam kengkawh zui nghalin India Independence hma chu an chhuak leh ta lo. Kristian Missionary te phei chu ram buai hnu deuh thleng khan engemawzat an la awm a nih kha.

Hetih hunlai (India Independence hma) hian Indian Sub-Continent (India, Pakistan, Bangladesh) chu British sawrkar awpbehna hnuaiah awmin British India tih a ni. British hoten India ram an awp lai hun, India Independence hma hi ‘British Colonial Period in India’ tia sawi a ni bawk. Colonialism Theory-ah chuan ram thiltithei zawkten ram chaklo zawkte awpbetin ro an relsak a; kawng hrang hranga an hmalakna leh hnathawh, a tha zawng leh a chhe zawng pawh nise, a awptuten anmahni hmakhaw ngai chung leh an lalram insawhngheh zelna tur thlir chunga tih a ni thin tlangpui. British hoin India an awp lai pawh khan he Theory hi an zui hle niin a hriat. An lalram sawhnghet zel tur leh India hmarchhaka daido turin Assam (Asom/Ahom lalram) an hneh phawt a, a ram michengte an lamtanga siam tur leh a ram mil eizawnna - thingpui huan siamin hma an la a ni.

Kumpinu sawrkar khan chuti takin Mizoram hrim hrim hi a awtin a lang lo, duh se chuan vailian vawi 1-naah khan an awpbet nghal thei reng niin a lang; mahse mizo lalte remna an siampui a, an inhnukdawk leh tlat. Tin, hemi hma lama Assam ram an beih lai pawh khan ramhnuai kara cheng mi tlemte (Anmahni sawi dan takah Forest Tribes / Forest dwellers) hneh kha an tan thil harsa a ni lo ang. Mizote kha tha te tein anmahni awm awmin lo awm ve hle hle se British ho khan an bei ngawtin a rinawm loh. Amaherawhchu mizoten Assam phaitual leh an thenawm hnam dangte runin an that fo mai a; British mi leh sate hial an lo thah takah chuan, East Bengal (Bangladesh lo ni ta) leh Burma inkar tlangram zingzuma cheng, mi kawlhsen leh lu la hnam awm reng mai chu an tan mita lungte awm ang tluka hnawk an lo ni ta a. Engti zawng emawni tala tukdawl an ngai. Chu chuan vailian vawi 2-na a hring a, Mizoram chu awpbeh a ni zui nghal a ni.

Khatih hunlaia mizote nunphung leh khawsak dan kha a la hniam hle; Mizorama British lalram tinghet tur leh an lamtang siam a, anmahni zui tur chuan mizote nasa taka tih finvar a tul a. Mizote ngaihpawimawh ber pawl sakhaw hmangin an bei tan ta a ni. Kum 1894 January ni 11-ah Kristian Missionary hmasaberten Aizawl an rawn thleng a, Kristian sakhaw thu an hril a. Kum 1896-ah mizo zinga kristian hmasa ber ni turin Taibuanga te thiandunin hming an pe a, reiloteah ram pumin Kristian kan ni nghal. Kum 1894 Feb-Mar thlaah A, AW, B siam tan a ni a, hemi kum vek April thla hian Sikul hawn tan nghal a ni; kum 1911-ah Mizoin Matric kan Pass tan a, 1924-ah B.A. kan Pass tan bawk. British hoin Mizoram an awp \an kum 1890 atanga kum 30 a liam hnu, kum 1920 a lo herchhuah meuh chuan British ho thiltum hlawhtlinzia kan hmu; kawng hrang hrangin an thuhnuaiah kan awm hneh ta hle a ni.   

Mizoram hmar lamah kum 1898 khan Presbyterian kohhran din a ni a; chhim lamah kum 1903-ah Baptist kohhran din a ni a; kum 1906-ah Zoram harhna hmasa ber a thleng a; kum 1907-ah Independent (Evangelical?) Church of Maraland din a ni a; kum 1910-ah Manipur-ah Independent Church of India din a niin hmarchhak State dangah a darh zui zel a; kum 1913-ah Evangelical Free Church of India din a ni a; kum 1917-ah Salvation Army din a ni a; kum 1925-ah Roman Catholic kohhran din a ni. Kristian sakhua kan hmelhriat tan atanga kum 30 awrh a liam hnu, kum 1935-a YMA din a nih hma hret thleng hian zofate khawvelah kohhran hrang 7 zet a piang hman a ni.

YMA dintu, Kristian Missionary Rev. L. Evans hi Mizoramah a awm rei lo, kum 8 (1929-1937) chauh a awm a ni. A awm chhung hi reilo mahse Mizoram dinhmun kawng hrang hranga a inlumleh dan hi a hmu chiang hle niin a hriat a, mizote hmalam hun tur a thlir thui hle niin a lang bawk. Kristian sakhua kan zui chin ata kum 30 awrh a liam a, ram pum deuhthawin Kristian kan ni nghal a, kohhran 7 a piang hman bawk; ziak leh chhiar kan thiamna lamah pawh kan chak hle. Hei hian mizote hi hnam luhlul lo tak, aia fing zawkten a tha tia an zirtir chu bawh hum hum nghal mai zel; khawvel finna chaka tuihal, changkan tum; kawng hrang hranga hmalam pan duh hnam kan ni tih a lantir; hei hi Rev. L. Evans hian ‘advantage’-ah a la ta a niin a lang.

Kum 1935 hma lama kohhran 7 zet lo piang chhuak hi rinna lama mizote kaihhruaitu, sap Missionary-te tan chuan a manganthlak ru ve deuh thinin ka ring. Mizote hmalam hun tur thlirpuiin an ngaihtuahna a buai ve nasa thin ang a. Chu mai bakah Kristian nih hma nunphung leh tihdan (Culture) tam tak kalsan mek zel a ni a, chutiang renga kal a nih vaih ‘Identity’ kan hloh mai dawn a ni. “Kan sakhua chu a tam zawkin kan la tak hle mai a, kan hnam nunphung (Culture) hnawk ti khawpin kan sakhawmi titih a. Mission sapte leh mizo zinga mithiam hmasate chuan Kristianna kan lak dan ‘rau’ ta lutuk chu hnam tan hlauhawm hring thei mai dawnin an hmu a, an vei hle tih a hriat theih. Kristian sakhua hian thih hnua chatuan nunna neih chauh tinzawn loin, he khawvela kan chen chhung pawh hian thilsiam dangte laka nun dan tha lantirte pawh hi a kawk tel tho a ni tih inzirtirna atan YMA hi an din ngei niin a lang” tiin K.Sapdanga chuan a sawi a (Zawlbuk, CYMA, 2010). Tin, “hei bakah hian, Mizote hnam anga  hma kan sawnna tur pawh an dah lian hle tih a lang chiang viau” a ti bawk.

Chutiang a nih avang tak chuan mizo zawng zawng huapzo, Kristian nih hma nunphung leh tihdan tha (Tlawmngaihna, chhiatni/thatnia intawiawm tawn, tanpui ngaite tanpui, vantlang nun inangtlang dial dial, leh adt.) chhawmnungtu tur, Kristianna kalsan si lo, kohhran pawl zawng zawng khaikhawm thei tur, nundan phung tha zirtirtu tur, kawng engkima zofate hmasawn zelna tur ngaihtu tur pawl din kha mifing boruak thlir thiam tan chuan tih makmawh niin a lang. Hei hi kum 1935-a Welsh kohhran hruaitu pathum lo zinte khan an rawn nemnghet ta chiah reng a ni. “Hemi tuma Mizoram changkan zel nana an sihhmuh ber pakhat chu – kawng tinrenga Mizo hnam mawhphurhna pek tam a ni a. Tin, Welsh ramah pawh chutiang ang khawtlang kaihhruaina pawl a tangkai thute an sawi bawk” tiin YMA hruaitu hmasa pawl Pu Muka chuan a sawi (YMA dinchhuah tan dan, Mission veng 70 years, 1940 - 2010). Hei hian Missionary-te, Mizo lehkhathiam leh hawizau hmasate kha a hneh hle niin a lang. Chu chu June ni 15, 1935 khan YLA tiin mawi takin a lo rah chhuak ta niin a lang bawk.

Tin, mizo ziak leh chhiar thiam hmasate khan an thiamna hmanga mipui, mawlmang ve tak takte rawngbawlsakna tur an van hle. Kristian kan lo nih tak duakah phei chuan kohhran pawn lamah thil tha ti tura thalai han inhawtkhawmna tur kha kan mamawh a ni. Chung mite chu kohhran hrang hrang atanga lo kal khawm an ni tawh ang a, a phuarkhawmtu tur a ngai bawk. Chhiatni thatnia insawngbawl dan inangtlang kan mamawh a, kohhran hrang hrang tihdan inpersan lutuk awm thei kha a fel lo bawk. Tin, mizo khawtlang nuna zawlbuk hlut zia sawi nawn a tul lo a; amaherawhchu YMA din atanga kum 3-na, 1938-ah ‘Official’ takin Mizoramah zawlbuk tihtawp a ni a; hemi hmalam hret pawh hian nunphung leh khawsak dan inthlak danglam vangin mizo khawtlang nunah zawlbuk hian a hlutna a hloh chho hret hret a, tihtawp mai a la tul dawn tih pawh a lang ruak tawhin a rinawm. Chuvangin zawlbuk thlakna tur (Substitute) tha tak, mizote changkang zel leh thang lo thar zel te mil tur ngaihtuah a ngai bawk. Heng zawng zawng mumal nei lek loa a puakdarh tur chu YMA din khan a hmet hlum ta a ni kan ti thei bawk ang.

Rev. Dr. H. Vanlalauva chuan hriselna leh thianghlimna kawnga hmahruaitu leh zirtirtu atan  Kristian Missionary-te khan YMA dinin, khawtinah bungbel leh in leh a vel vawn fai dan min zirtir a, chumi avanga hriselna leh faina kawnga tun dinhmun thleng thei kan ni tiin a sawi a (Nilai leh beihrual thupui 2011, SLPB, 2010). Tin, C.Rokhuma pawhin khawtlang nun hmasawn zel tura inkaihhruai kan mamawh zia tarlangin, khang hunlai Mizote kha thianghlimna kawng, a bik takin zunram thiar thuah kan hnufual hle. Kum 1950 thlenga YMA thuchah zinga an dah chu ‘zunram thiar thu’ a ni tiin mipui vantlang zirtir kan ngaih hle thu a sawi (Zawlbuk, CYMA, 2010). Hengte hian heti lam kawnga zirtirtu kan mamawh zia a tarlang chiang hle a, chu kan mamawh zirna chu YMA lo piangchhuak kaltlangin zirtir kan ni chho tan ta a ni kan thei bawk ang. 

YMA hi heti taka pawl lian a lo nih theihna chhan nia lang chu thil tha zawng zawng min rawn thlentu ti hiala kan sawi thin, Kristian Missionary-te min din sak a ni a, vawiin thleng hian an hniakhnung zui kawngah hian kan la pen chak hrim hrim a. Tin, mizote tan YMA hi a lo thain a lo tangkai kher em lah tak a. YMA chanchin Aizawl atanga Mizoram hmun hrang hranga pu darh a, dintu te hi a hunlaia khawkhat rawn kai, ziak leh chhiar thiam hmasa, Aizawl chanchin hre deuh, lal (Headman) leh Kristian tirhkoh hmasate an ni tlangpui. Mizoram khaw hrang hranga YMA hruaitu (President / Secretary) hmasa ber pawlte pawh lal (Headman) emaw, tirhkohte emaw an ni deuh zel. Amaherawhchu hetih hunlaia lalna (Headmanship) hi Sailoa leh a thlahte inrochun lalna (Heirship) ang chi nilo lalna kha tam tak a awm tawh a ni. A chang chuan British ho khan an thuawih thei leh an lamtang te, sipai bang te, Rahsi (C.I.) hnathawk tha te duhsak nan leh chawimawi let ve nan lalna (Headmanship) hi an pe mai thin ve bawk niin a lang. Khaw khat lalber leh kohhran rawngbawltu berin an tuipui (Pratronised) viau chuan pawl lian chaklo chi a ni lo; chung mite chu khaw tina a thahnemngai, khaw mipuite thatna duhtu leh hmasawn zel duhtu te an ni chawk. Hei hian a dintirh phat atangin YMA kalsual tur leh a thuthlung pen bo san tur a veng hle a; tin, hun lo la awm zel tur atan YMA kalphung a hril thui hle a ni kan ti thei bawk ang. 

Kum 1885 khan Indian Civil Service officer pension pachal, British Indian sawrkarah pawh hna sang tak lo thawk tawh, A.O. Hume kaihhruaina hnuaiah Indian National Congress (INC) din a ni a. Hei hi mi tamtak chuan India mipuite mamawh chhanna lam ai mahin British lalram sawhngheh zelna tur leh, India mipui lungawilote thawidamna hlet tiin “Safety Valve Theory” an vuah a; Historian leh Politician-te inhnialna tawp thei lo a hring chhuak a ni, chutiangin YMA lo pianchhuah danah pawh hian inhnialna tam tak a awm thei awm e. INC lo pianchhuah dan leh chuta tanga kum 50 liam hnu, kum 1935-a Rev. L. Evans kaihhruaina hnuaia Mizorama YMA din a ni hi a mak ve riauna lai te pawh a awmin ka hria. Kum zabi hrang daih, mahse hun inkar hlat si lo; vawiin thlenga ramin a ngaihchan, mipui nawlpui leh sawrkar hawiher pawh thlak danglam dawrh thei khawpa pawl chak lo dinchhuah dan hi engvang pawh, tihpalh thil pawh nise pumpelh chi a ni lo tih han thlirlet hian a chiang thei ang.

Engpawh chu lo ni se zofa piangchhuak tawh reng reng chuan YMA hi kan pumpelh thei lova, YMA hian a mamawhtu apiang; zofate leh vai leh sap chenin, mi tumah a pumpelh ngailo bawk.  Kum 80 dawn, vawiin thleng hian zofate inhumhimna leh zarhliahtu nihliap pawimawh tak a la ni reng a, a ni reng kumkhua tur pawh a ni. He nihliap zar hnuaiah hian kohhran hrang hrang, zohnahthlak zawng zawng, Political Party, zirlai pawl, upa pawl, hmeichhe pawl, sawrkar hnathawk pawl, kuthnathawk pawl, tlawmngai pawl dang leh tlawmngai pawl ni chiah lo thlengin kan leng vek a ni.

Amaherawhchu hruaitu nih duhna leh lansarh tumna te, in itsikna leh midang elrelna te, eirukna leh thamna te, ruihlo leh nawmchenna te, rethei leh hausa inthliarhranna ten he nihliap zar hnuaiah hian hmun an chang tur a ni lo. YMA member zawng zawngten a thiltum, a dinchhan, a nihna, a thuvawn, a thuthlung leh inkaihhruaina te hrechiang a; YMA nihliap zar hnuaiah YMA Kross pu chunga kal kan rem tlan loh chuan Pu Niara te, Pu Pasena te leh Pu Vankhuma ten hun lo la awm zel tur thlir ran chunga an lo dinchhan ‘Principle’ hi kalsanin an ‘Future Vision’ ah hian kan lang ve lo hlauh dah ang e. He zofate nihliap lian awmchhun hi a pawpte thawm that a, a tang kawite tih ngil leh a fawng chhiate siamthat hi ram chhung leh pawna YMA member zawng zawngte mawhphurhna a ni. Chutianga he kan nihliap lian hi siamthat ngaia a awm lohna turin, zah tak leh uluk takin kan keng ang a, ngun takin kan enkawl thin tur a ni.

April, 2011.

Zawlnuam.