Zawhna: Sawrkar hi enge?

 

Chhanna:

1. Sawrkar chu ‘Ram leh Mipui’ fel taka rorelsak kan nih theihna atana inrelbawlna a ni.

2. Sawrkar chu kan ta, kan siam, kan hnena awm a ni. Sawrkar angchhungah kan awm a, kan angchhungah sawrkar a awm a ni.

3. Sawrkar chu ropui taka chungnung lurh a ni lo a, mi rethei ber leh mawlmang ber kaikuah phak a ni. Sawrkarah lal thuthleng a awm lo a, hnathawh kawr leh mipui rawngbawlna hmanrua a awm.

4. Sawrkar chu dan siamtu a ni a, dan anga fel thlep thlawpa thil ti tur a ni; chiri taka thil mumallo ti mai mai tur a ni lo.

5. Sawrkar chu thil thlawn pek semtu a ni lo a, kan chhungkua min chawmtu pawh a ni lo. Sawrkar chu hmasawnna kuangfung duangtu a ni a, chu chu mipuiten kan lo chhawr ang.

 

Sawifiahna:

1. Insawrkar dan chi hrang hrang a awm a, kan ram insawrkar dan democracy hi ‘Mipui Thuneihna’ tihna mai a ni. Mipuiten kan aiawh tur insawrkarnaa mawhphurtute kan thlang chhuak a, thlanchhuahte chu dan hmangin thuneihna leh mawhphurhna kan pe a, chu chu ‘Ram leh Mipui tan’ liau liau a ni. Thlanchhuahte chuan ro an rel ang a, dan an siam ang a, hmasawnna kuangfung an duang ang. Heng zawng zawng hi ‘Ram leh Mipui tan’ a ni, a dang a awm lo.

 

2. Insawrkarna fel taka a kal theihnan hnathawktu tam tak a ngai a, chung mite chu sawrkar hnathawkte an ni. Tichuan, democracy insawrkarnaah hian mipui hlawm thum kan lo awm ta a- mipui nawlpui te, sawrkar hnathawk te, thlanchhuah roreltu te. A engamah hi invaivung tur leh mahni duh lam hawia thil ti thei kan awm lo, ‘Ram leh Mipui tan’ a nih ngawt loh chuan. Dan hmaah mitin kan inang vek a, kan thuneihna a san poh leh kan mawhphurhna a sang poh mai zawk a ni. Mi tupawh, mipui kan ni emaw, sawrkar mi kan ni emaw, hruaitu kan ni emaw, ‘Ram leh Mipui tan’ thil tha ti lo leh thil tha lo ti kan awm chuan danin a kawng a zawh ang a, hrem ngai chu hrem tur a ni. Chutiang tih theihna dan chu kan zavaia hnena pek a ni a; kan intanpui tawn ang a, kan invenpui tawn tur a ni.

 

3. Abraham Lincoln chuan, ‘sawrkar chu mipuite ta, mipuite siam, mipuite tan a ni’ a ti a, a fun kim hle. Inthlan apiangin duhthlan tur chhawpsak kan ni a; khawia mi pawh, eng mi pawh nise mipui tam berin kan duhthlante chu roreltute a ni. Thlanchhuah atangin mawhphurhna kuangfung pawimawh zual changtute inruat a ni a, a khaikhawmtu leh hmahruaitu inruat a ni bawk. Kil hrang hrang atanga thlanchhuah an ni thei a, a zahawm ber zawk chu mipuite duhthlanna a ni. Ruling bial, opposition bial tih te hi sawi sawi tur pawh a ni lo; heng biala mipuite hi kan ram mi ni ve lova kan ngai a nih ngawt loh chuan.

 

4. Insawrkarna atana kan sum mamawhte hi khawi atang mahin sawrkarin a haichhuak hran lo, mipuiten kan thawhkhawm a ni. Chaw kan ei maw, meizial kan zu emaw, zu kan in emaw, kan inbual emaw, TV kan en emaw, motor kan chuang emaw, kan hausa emaw, kan rethei emaw; mitinin thil kan lei/hralh apiangin sawrkar sumbawmah pawisa kan thawh zel a ni. Kan chetvelna, kan mamawh leh duhzawng a tam poh leh sawrkar sumbawmah pawisa kan thawh hnem a ni mai. He mipui sum thawhkhawm hi renchem em em tur a ni a, ‘Ram leh Mipui tan’ uluk leh daihzai theihtawpa hman tur a ni a, hma kan sawnpui ngei ngei tur a ni. He mipui sum mahni tana lo chheprelh kan awm chuan dan angin kan hrem tur a ni a, an lo lawr chhen phei chuan mipuiin kan umbo mai tur a ni.

 

5. Thil chiang tak a lang ta. Insawrkarnaah chuan mipui vantlang, sawrkar hnathawk, thlanchhuah roreltu; kan vaiin kan pawimawh ta vek mai a. Heng zawng zawng min khaikhawmtu leh hmahruaitu pawimawh zia hian a kuang a fawn liam a, chutihlaia kan rualawhna reh thei lo erawh ngaihtuah a ngai e. He thu I chhiar hian ram hruaitute an lo lang zut zut ang a; nimahsela chungte chu kan ram hruaitute nilovin Arvind Kejriwal, Mamata Banerjee, Manik Sarkar, Nitish Kumar te an ni ang. Insawrkarnaah hian ‘hero’ nih tum chi a ni lova, mawhphurhna la chunga thawhchhuah chi a ni tih te I ngaihtuah zui ang a, I thin a rim hlur ang. Thawpik zetin “I'm not looking for somebody with some superhuman gifts, some superhero, some fairy-tale bliss. Just something I can turn to, somebody I can kiss” tih hla te hi kan sa kan sa mai zuk nia.

 

Thubelh:

Dan rorelna (rule of law) a fel chuan mipui kan zalen a, ramin hma a sawn a, mipui kan him bawk a ni. Dan tam tak a awm a, dana inziak (writings) a pawimawh rualin danin a tum (purpose/intention) phawkchhuak fuh rorelna / thutlukna dik (justice) hi a pawimawh bawk si. India danpui (constitution) pawh khauh hle mahse pawhfan theih (rigid & flexible) a ni. Chuvangin, dana inziak en bing ngur theih a ni ngawt lo a, khatiang ang thubuai kha tunhmain rel a ni tawh em tih te, a chalremna thu te ennawn leh fo a ni thin (precedence). Hei hi a fel tawk zo mai bik lo a; mihring ṭhaṭna dan (moral law) te, khuarel dan (natural law) te pawh hnualsuat ngawt theih chu a ni lovang.

 

Tichuan, mipuiten khua leh tui kan nih anga kan chanvo dik tak chan hi kan phu a, kan chang ngei tur pawh a ni. Chutiang tur chuan thil a kal em? Insawrkarna a fel em? Hmasawnna hnathawh a dik em? tih te pawh kan endik thei a ni. Chu chu tu tih tur bik mah a ni lo a, kan zavaia kan chanvo a ni. Entirnan, East Lungdar pa chuan hmasawnna hnathawh kalphung ṭhenkhat chu dik tawk lovin a hria a, Prime Minister hnenah lehkha a thawn mai a. Chutianga tih theihna dan fel tak a awm a, PM office pawhin dan angin chhanna a pe mai a ni. Tin, tunlai hian Mizorama kawngpui siam mek hmun ṭhenkhat chu a tha lo hle a niawm a. Heng hna hi mipuiten RTI dan hmanga a hna kalhmang lehkha pawimawhte lak chhuah a, endik mai tur a ni. A lo rei ang a; kan insumdawn tawnna, kan zin veivahna, kan lirtheiin a tuar ang a, nunna chan hial pawh kan awm thei. Mi tu emaw suahsual vang mai maia kawngpui ṭha lo neih kan phu lo. Hei hi entirna mai chauh a ni, hmasawnna kuangfung dang tam tak endik tur a awm ang.

 

Chutiangin, kan covid hmachhawn dan te, hmasawnna hnathawh hrang hrang te, SEDP chhehhnawkte pawh (zirtirtu lak karei!). Dan lo anga thil tih an awm chuan danin a kawng a zawh ve mai tur a ni. Chu chu mi pawisawina leh inhuatna lam a ni lo, ‘Ram leh Mipui tan’ hmasawnna kuangfung duan anga thil ti duh lo chu ‘Ram leh Mipui’ pawisawitute an ni zawk; hrem tur an ni a, huat tur an ni. He mipui dikna chanvo pawimawh tak hi kan hai der luih rei poh leh kan tuar rei dawn a ni mai. Dik chu dik, dik lo chu dik lo- hei hi kan ‘Ram leh Mipui’ damna tur chu a ni mai, a bak a awm lo. Hriat ril tur leh sawi fiah tur pawh a awm chuang lo.

 

A tawk e!

"Eng hian nge ram hruaitu kan thlannaah thutlukna min siamsak?" tih hi kan ngaihtuah nawn a ngai. Kan ram inrelbawlna kawngah hian, "Eng system nge pek kan nih? Eng system nge kan beisei zel dawn?" tih hi ngaihdan min siamsaktu ni tawh teh se. Thil holam te te hian kan ngaihtuahna hruai suh se la, ‘Ram leh Mipuite’ hi kan inngaihtuah a ngai ta e.