Khawvel ram hrang hranga Covid-19 hrilengin India a rawn lut a, hmarchhak pawh hlauhna leh fimkhurna fawn vel chuan min nang ta. Chu chuan kan mamawh chawkluhna a nghawng thut kan hlau a, Aizawlah chuan March ni 10 leh ni 11 khan ei-bar, nitin mamawh leh damdawi ṭul zual pui kan lakkhawm ta sup sup mai a ni.
He boruak avang hian keimahni leh keimahni kan indem chiam mai a, kan indeusawh a, kan innuih a, zonunmawi leh sakhuana nen lam hmer telin kan inchachhuah ta sak sak mai a ni. Mahse, ngun zawkin ngaihtuah ta ila, he thawm bengchheng ri nuaih nuaih karah hian thawm dang a awm em? Mipui sa mur mur hi a chhan, thui deuh hlek thlirin ngaihtuahna i han hmang teh ang u.
Tunlai khawvelah mizote pawh kan vak darh chak si a, kan kutin khawvel kan hawl kual bawk nen. Kumin 2020 kumtir aṭang tawh khan kan sawi kan sawi a, khawvel kan thlir a, TV leh phone-ah kan en a, India ram kan hmu a. Kan state dinhmun kan hria a, kan thla a muang lo a ni. Ei leh bara kan pachhiatzia lah tu hrilh mah kan ngai lo. Hetia mipuite kan phi ruai fe tawh hnuah pawh kan beisei aiin a rorel khawl lam chu an che zung zung ta mai lo deuh a ni. He dinhmunah hian nghei bik hlauh vanga inchhekkhawl vak (panic buying) hi thleng thei a ni tih a lanna a rei tawh.
Panic buying hi ram changkang zawkah pawh a thleng fo. Kan dinhmun enin helaia lo indem vak tur kan ni lo ang. Public welfare ngaihtuah chuan rilruah sawrkar a lo lang nghal. Hetiang boruak laka invenna tur dan a awm a, public welfare atan dan lekkawh vat a nih si loh chuan mipui chu kan sa mur mur dawn reng a ni. Mi ṭhenkhatin an lo chuh chak deuh vanga hnam puma inhmer a, zahpuiawm bik viau anga insawi hi a kan vaia nihna a ni lo. Dan leh thupekah mipuiin rinna kan nghah lohzia tilangtu a ni. YMA lam an che vat zawk a, a nih tur ang kan nih deuh duak tawh hnuah ei-bar vilvenna dan chu lekkawh a ni ta chauh tho a, a ṭha e.
Social media a chak lutuk tawh a, a lehlingin thudik tawk lo a darh nasa kan ti. A dik, a darh ang chu, mizorama mobile phone zat hi chhiar mai la. Hetiang boruakah hian public relation ṭha tak nen inralrinna thu te, sawrkar inbuatsaihna te, invenna lam te, inthlamuanna te, dan leh thupek lekkawhna te hi a hmalamin darh vut vut se la a va ṭha dawn em.
Mizo mipuite hi dem tur kan awm lo e. A dik leh tha nia kan hriatah chuan keini aia thuawih thei hnam hi an awm kher lo ang. Dam leh tlang khatah, thih leh ruam khatah tih hi kan thisenah a la zam reng a, chu thisen tho chuan kan la intungnung der der zawk a ni asin.
Mipui lam, rorelsaka awm te hian dik takin sawi ta ila, state kan nih aṭangin kum 33 chuang a liam ta. He kum 33 chhung hian mipuite hmakhua leh ram hmasawnna ngaihtuah a ni tawk lo atin a ni. Thin tawt takin sawi ta ila, roreltuten rorelsakte min rap sawr a, chu chu kan ram inlumleh danah hian a chiang em em a ni. Manik Sarkar, Nitish Kumar leh Arvind Kejriwal te ho chu ro min rel saktu atan kan awt ta ngawih ngawih mai a nih hi.
Dik tak chuan mipui nunzia hi en ila; sawrkar thil a ni emaw, Kohhran thil a ni emaw, khawtlang thil a ni emaw, a thuneitute thu anga awm mai zel hnam kan ni. Val Upa thuchhuak ngaichang ṭhin hnam kha kan la ni tlat. Ration lak dawn pawhin card dahna indawt dan te, retailer te buk kan la ring tawk a. Kan veng/khua hruaitute kutah nasa takin kan la innghat ngam bawk. Mipuite ei leh bar dinhmun erawh a tha hran lo a, chu chuan manganna a thlen hma em em thung. Tun kan dinhmuna lo lang pawh hi Pi leh Pu te hunlai atanga kan chin thin, chhuanchham nih bik duh ngai lohna zia chikhat a ni zawk, a ler lam erawh a duap rih mai chauh a ni e. Ei leh bar leh mamawh dang chhekkhawl hian kan hnam zia ṭha lai a tarlang a, a kumleh hawpkhawp tharchhuah tum ṭhin kan nihna zia kha a ni. Aizawla cheng mipui zatve aia tamin khami ni khan ei bar chhekkhawla lakkhawm an tumloin a rinawm. Sem sem dam dam eibil thi thi tih hi mizo mipui tam zawk te thupui a la ni ngei e. A thu hrimin heng kan nitin mamawhte hi lo nghei tak tak dawn ta pawh ni ila, kan inpeizawn em em ang tih hi a rinhlelhawm loh e.
Kan hnam zia a bo tawh kan ti maw! a bo ngai lo ang. Kristianna kan dem ang maw! hnai lo e. Dawrkai te kan dem anih pawhin a hnarkaitu an ni bawk hek lo. Mipuite kan indem maw! Chulam a ni awkawng lo, kan hriat fuh tawkloh vang a ni zawk e. Hei erawh a chiang ngang mai; ram mipuiten mamawh kan nei a, chu kan mamawh chu kum 33 chuang a roreltu lamten vawiin thlenga an rorelnaah kan hmu lo a, chutiang rorelna rah chhuah chuan kan thla a ti muang zo ta lo a ni.
Hnam hnatlang thukhat vua sing tel pungkhawm, khawtlang nuna inpeizawn tel tel ṭhin, lehlam side a awl reng chung pawha traffic line cross duh lo, nghahloh dawr neitute tho kha kan la ni; kan la danglam lo e. Mahse he hnam hi a chak lo a, kan huai tawk thei lo. Chak thei kan ni a, mahse kum 33 chuang rorelna hian chak thei lo turin min siam a, bet tlawk tlawk tura rorelsak kan ni. Heti reng reng hi chuan UCC leh CAA pawh hi lo hrang tak tak se, han ṭang rei thei tur hi kan awm mawlh lo e.
Buaina zawng zawng hian engtikahmah min kiansan vek dawn hauh lo tih chu kan hria e. Mahse, kan ram leh hnam mahni kea a din ve theih hun tur te, ei leh bara kan intodelh ve hun tur te hi nghakhlel takin kan awm a, duhthu kan sam a, ring fanin raltiang ram chu kan thlir ṭhin. Chumi bul chu sawrkar ṭha a ni tih kan hrethiam a, a kalkawng pawh politics a ni tih kan hria.
Kan ram leh hnam hian mamawh kan nei a, kan mamawh hi kan la hmu thei rih lo a ni. Engtikah emaw chuan, rorelsaka awm te tan zangkhua pawh a la bungbu ngei ang. Chutih hunah chuan ni khat thilthua Aizawl mipui zatve pawh tlinglo ten ei bar an chhekkhawl vak mai hi mak kan la ti ang. Chutih hunah chuan hetih hunlaia mipuite hi an mawl lo a, chhuanchham hlauhna avanga an mangannaah hian mawh an phur lo tih pawh kan la hre chhuak ngei ang.
Isaak Ramdinthara
KJ Lalbiakngheta
Comments