Right To Food

Mau a tam, ril a tam

            Mizoram hi kum sawmnga danah Mautam tamin min nang a, retheih tawh sa nakalaiin thlai tharchhuah tur a thahnem meuh lo. State intodelh lo tak, mahni eikhawp pawh thar chhuak thei lo kan ni a. Heti chung pawh hian agriculture policy fumfe leh kan mamawh ber eitur intodelh tuma tanlakna mumal a awm meuh lo. Kuthnathawktute tana hamthatna tur ber thlai thar hralhna chiang sa (market assurance) leh vanduai palh thu hlaa invenna (crop insurance) a awm bawk hek lo. Chutih lai mekin khawvel pumah khuahkhirh ngaihna awm lovin ei leh in man a sang chho zel si a, sawrkar laipui pawh a lu a hai thin hle a nih hi.

 

            Keini state zawng kristianna leh Mizo tlawmngaihna nen, Kohhran leh pawl ho hmalakna nen, ‘dam leh tlang khatah’ tiin kan la inpeizawn thei a, a thlamuanthlak rualin buhfai a awm laia a leina tur nei si lo nih a hlauhawm hle. Hei vang hian sawrkarin mipuite tana hmasawnna tur ruahmanna te chak zawka kalpui a tul hle.

Right to food

            General Comment 12 of the UN Committee on Economic, Social and Cultural Rights 1999-in Right to food awmzia a sawi chu ‘Right to Food hi mi zawng zawng huap a ni a, mi tu pawhin englai pawhin chaw eitur thawhchhuahna tha leh thawhchhuah dan dik an nei tur a ni a, chung an mamawh an hmuh theihna tur pawh chu anmahni tana pawi lo leh him, an hnamzia leh sakhua pawhin a pawm theih a ni tur a ni. Mi tu pawhin ama duhthu leh tih theih piah lama a chaw mamawh te a hai lut thei lo a nih chuan (e.g. piansualna, tam tla, chiatrupna thleng, etc), a mamawh pek chu sawrkar tih tur a ni’ tiin.

            Universal Declaration of Human Rights chuan Right to Food hi mihring dikna chanvo (human rights) tam tak zinga pakhat atan a lo puang tawh a. Kum 66 khan he right hi International Covenant on Economic, Social and Cultural Rights-ah belh a ni a, ram 56 (India ram pawh telin) in an pawm nghal a ni. Kum 1966 World Food Summit pawhin khawvel puma mahni mamawh tawk eitur nei lo zat chu kum 2015-ah chuan a zatvea tihniam tura tan lak nise a ti a. Food and Agricultural Organization (FAO) pawhin November khan hemi atana hnathawh tipuitling chho turin Righ to Food unit a duang thar ve bawk. Right to Food campaign hi India, Brazil, South Africa, New Zealand, etc ah te neih a ni tawh bawk.  Tin, kum 2007 World Food Day-ah khan FAO chuan theme atan ‘Right to Food hi mi zawng zawng dikna chanvo a ni’ tih hi a lo hmang tawh bawk a ni.

India leh Right to Food

            India ram danpui (constitution) ah hian he Right to Food atana chiang taka ruahmanna leh kalphung duan a awm lo. Amaherawhchu People’s Union for Civil Liberty (PUCL) in Supreme Court-a petition a thehluh azarah SC chuan ‘Right to Food hian Fundamental Rights-a Right to Live (article 21) a kaihhnawih niin a sawi theih a, a chhan pawh mi tumah hi chaw tellovin kan nung (live) thei lo a ni’ tiin a hrilhfiah a ni.

            Sawrkar laipui pawhin helam hawi zawnga hmalakna a nei nual mai. Chaw atana India ram mipuite rin pui ber heng rice, wheat, pulses, etc tharchhuah lama hmalakna National Food Security Mission te kalpui a ni a. Tin, sawrkar laipuiin state sawrkar ten agriculture development lama hmalakna hmasa atana tanpuina 100% grant an pekchhuah theihna tur Rashtriya Krishi Vikas Yojana te duanchhuah a ni bawk.

Tihdam kan ngai

            Dam chhunga taima tak leh rim taka thawh pawha dinhmun kang thei reng reng lo, intodelh chu sawi loh, nitin eichawp zawn ngai, ration buhfai lakna tur pawh harsa, in leh lo tlabal tak tak mi tam tak kan ramah hian kan awm a. Kan mipui te tawrhna ka hmuh hian ka thin a na thin. Engemaw kan ngaihtuah a, damchhung reilote lungkhama kan unau te ngaihsak hman lek lova kan inchhek arbawm thin le? A lova kan awm theih loh, kan nitin mamawh ei tur tal hi chu inpeizawn tlang tel tel teh ang u.

(He article hi Vanglaini (17.5.2008)-ah tihchhuah a ni)