Khawthlang Ram Luah Tan Dan (Rengdil, Zamuang leh Zawlnuam lo din tan dan leh a dintute chanchin tawi)

Kan pi leh pu, min thlahtute hming daihlohnan ka hlan e.

Tlaikhawhnu fe ah, kum 2011 aṭang khan ka theih angin Rengdil, Zamuang leh Zawlnuam lo din ṭan dan leh a dintu kan pu te chanchin hi ka chhui ve e ka tia. Hemi atan hian vawi 2 emaw chu Rengdil, Zamuang leh Zawlnuam ka kal a. Tin, Saron Venga kan pu K.Thanchama te unau ka tlawh a, Armed Veng thlanmuala Pastor Thankunga leh Darṭhuami te nupa thlan ka tlawh bawk. Heti hian, dik tawk lo emaw, famkim tawk lo emaw a awm theiin ka ring, thurawn dawng turin ka inpeih reng e.

Rengdil Centenary (1922-2022) denchhenin Whatsapp-ah kan han sawi kan han sawi a, a hre hlei hlei te leh chanchin ziakna nei ṭha zawkte pawh kan la awm niin a lang a. Kei phei chu naupanga thuchang tih takah, ka la hamkhawm kim tawk lo tih a chiang ta. Hetiang taka kan pi pu te chanchin kan lo hlut tih hriat hi a lawmawm em em a ni. Engpawhnise ka hriatchin leh lakkhawmchin hi tihian ka'n paupui ve reng reng ang e.

Mizoram hmar thlang tawpa khaw hrang hrang te hi state dang, Assam leh Tripura ramria daido tu an ni a, ram pum huap pawhin an dinhmun hi a pawimawh hle. Tun tumah hian Rengdil, Zamuang leh Zawlnuam lo din tan dan kan chhui deuh bik dawn a, a tul angin khaw dang te chanchin pawh kan sawi tel ang. Heng khaw pathum te lo din chhan bulpui ber chu Durtlanga chaprahsi (Circle Interpreter) hna thawk thin Darsata Khiangte a ni. Darsata pa hi Chiauva (Chiaukhawka an tih bawk) a ni a, Chiauva pa chu Heithanga Khiangte Khupchhung a ni.

Heithanga

Heithanga hi mi huaisen, leihlawn malzawh ngam ngat a ni a. Lentlang thlang lamah a chi te (Khiangte) ho awpkhawma lalna nei hran lo mah se a chipui te rawn ber a ni a, lal pawhin a ring em em thin, Fa pathum a nei nia sawi a ni a, amaherawhchu Vaitlaia leh Chiauva bak chu ka hrechhuak thei rih ta lo a ni.

Chiauva

Chiauva hi a pianna hmun leh a kum te sawi chian fak a harsa tawh deuh a. Selama an awm laiin a tlangval tan a ni. Bualpheng an kai a, nupuiah Hnuaithangi a nei a; Khawbel an kai a, hetah hian lal upa a ni tan. Lalpa Vuta’n belrawhmual killin Rullam a awp tir a, helai atang hian Ngentiang an kai a. Kangzawng an kai phei a, chulai atangin Khiangtui an kai leh a. Sialhawk kai pheiin lalpa Vuta nen an awmdun leh a, Khawhai kai pheiin chumi atangin Sesawngah an chhuk a. Sesawnga an awm lai hian vailianin khua an hal avangin an darh zo ta a. Kawnpuiah chhukin hemi atang hian Aizawl thingpui huanah chhoin sawrkar bel nawt hmasa ber pawl a ni. Kum 1892-ah Chaltlangah veng neiin a awm leh a; Durtlangah chhoin kum 1915 bul lamah kum 75 mi niin a thi ta ni. Fa panga a nei.

Darsata

Rengdil khaw dintu leh lal hmasa ber Darsata hi kum 1879-ah Rullamah a piang a, Chaltlanga an awm lai kum 1902 vel atangin C.I. a ni a, circle no. 1 Sihphirah dah a ni. Kum 1909-ah Kristian a ni a, a kumleh 1910-ah baptisma changin kum 1911 presbytery inkhawmpuiah kohhran upa atan nemngheh a ni a, Mizorama kohhran upa nemngheh hmasak ber dawttu a ni. Kum 1915-ah Durtlangah dawr kai tanin kum 1918-ah Aizawlah dawrkai vekin a insawn leh a ni. Darsata hi a dam rei lo a, Rengdil an luah tan atanga kum thumna 1925 December thlaah kum 54 mi chauh niin a thi ta a ni. Lal tha, khua leh tui te hmangaih mi leh khawngaihna ngah tak anih avangin khawtlang leh kohhranin an ui hle a ni. A nupui Haurumi a ni a, an fate chu Thankunga, Rualkhuma, Thangliana, Bawii, Lalhmingthangi, Lalremi, Hmingliani, Malsawma leh Lalawii te an ni.

Tuahkima

Darsata a thih tak avang hian a nau Tuahkima chu lal a lo ni ta a, a u ai a awh zo hle nghe nghe a ni. Tuahkima hi kum 1881-ah a piang a, kum 1908-ah nupui a nei a. Kum 1909-ah Kristian a ni a, kum 1920-ah baptisma a chang a, kum 1911 presbytery-a Mizoram Kohhran upa nemngheh hmasak ber te zinga mi a ni. Dawrkai leh bawnghnute zawrh hi a eizawnna ber a ni. Kum 1924-ah Rengdilah a chhuk a, a u chu a lo thih tep tawh avangin roreltu ber a ni zui nghal a, a thu leh hla vekin engkim an ti ta a ni. Fa sawmpathum neiin kum 1943 January ni 2 khan a thi ta a ni. A fate chu Lianchhunga, Thanchhungi, Buanga, Puia, Mami, Hmangaiha, Lalengliana, |huami, Chhanhimi, Khawtinchawma, Darchuailova, Lalsiami leh Khiangzika te an ni.

Rengdil leh Zamuang luah tan dan

            Darsata hnena lalna tlang atana Rengdil ram pek a nih dan hi sawi dan hrang a awm. Zawlnuam Kohhran Chanchin (1939-1993) ah chuan ‘amah hi rahsi hmasa pawl a ni a, lalna tlang atan Rengdil ram hi bawrhsapin a pe mai’ nia sawi a ni a. Rengdil Kohhran Chanchin (1922-1993) ah chuan ‘kum 1921 khan a mumangah ram nuam tak fan pui a ni a, chu ram chu a dil chuan Pathian lalna atan pek a nih tur thu an lo hrilh a, tichuan tawngtaina nen huphurh tak chungin bawrhsap hnenah a dil ta a. A nu phei chuan sailo lal an tam em avangin dil buai lo mai turin a ti nghe nghe a ni. Nimahsela a dilna chu pawmsak a ni a, Rengdil ram hi ramri te siamsak fel vekin pek a ni ta a ni.’ Ram pe tu bawrhsap hi W.L Scott nia sawi a ni bawk. Zamuang Kohhran Chanchin (1930-1993) ah chuan ‘a hna a bansan hnu hian a hrisel lo chhunzawm ta viau a, chuvangin a nuin tawngtaisak chungin bawrhsap hnenah ram dil mai turin a ti a. A nu thuawih chuan a dil ta a, bawrhsap chuan a duhna hmun thlantirin Rengdil ram hi a lo pe ta a ni.’ Chutih laia bawrhsap chu S.N. Mackenzie tih a ni thung.

            Darsata chu kum 1922 January thla chawhma lamah Durtlang a\angin midang (chhungkaw dang?) pakua te nen awmhmun bengbel turin an chhuk ta a ni. Tuna bukpui mual tih takah hian buk an sa phawt a, buh an thar hma chuan Teirei lui rala Kapdaia khua Sabualah buh an phur thin. Bukpui mualah hian rei fe khawsain kum 1923-ah tlangdung hmun rem lai, tuna khua atanga chhim lam kilometer 2 vel khaw hmun hluiah an insawn chhuak ta a ni. He hmunah hian Durtlang, Sabual leh Reng ram (Tripura) atanga lo pema rawn beltute nen reiloteah in 60 zet an ni chho nghal a ni. Amaherawhchu he hmun hi hriselna lamah tha tawk lova hriatna a awm a, kum 1941-ah hmar lam kilometer 1 velah khawthar an kai leh a. Helai hmun pawh hi a tlang te zo nuam hle mah se kawngpuiin a pawh hleithei ta lo a. Ram lo changkang zel turah harsatna a awm theih dawn avangin tuna khaw hmunah hian khaw thar siamin kum 1972 atangin an kai phei leh ta a, kum 1978-ah chuan an insuan zo fel ta a ni.

            Hetih hunlai (1922) vel hian henglai bawr velah lal tumah ram neiin an la awm lo a. Rosailuti ho in pali vel chu Kawrthahah an awm a, mahse reiloteah Raja Hrangvunga hoten Jampui (Tripura) ah an hruai thla a ni. Nimahsela Rengdil an luah hnu atanga rei vak lo ah hmar lam leh chhimah khaw din tum an awm ve ta hlawm a. Kum 1928-ah Zataia fapa Lalkhuma’n Hriphaw a kai a. Tin, chutih lai vekin Khawzadala fapa Lalngurliana’n Kawrthah a rawn kai bawk a. Thankunga awm a nuam thei ta lo a, kum 1930-ah chuan Hriphaw lama ram zauh nan leh ram humhalh nan in 13 nen Reng lal ho kulh lo siam tawhna hmun Lungkulh an luah phei ta a ni. Mahse chu hmun chu tuilak a harsa bawk nen awm reng nan thain an hre ta lo a, krismas leh kumthar an hman zawh hnuin kum 1931 kumtir lamah Lungkulh atanga chhim lam kilometer 5 vela hla, tuna forest I.B. tlangah hian an insuan phei leh ta a ni. Hetah hian in 8-in rawn belhin Zamuang khua hi a lo ding ta a ni. Kum 1933-ah tuna Presbyterian pastor quarters awmna tlangah hian an insawn chho leh a, he hmunah hian Mizo ngawt pawh in 35 zet an ni tawh a ni.

Thankunga

            Zamuang lal Thankunga hi Darsata fapa upa ber niin kum 1902 April ni 14-ah Sihphirah a piang a, a pa ruala Kristian niin baptisma pawh a chang ve nghal a ni. Ani pawh hi a pa leh patea te ang tho a lal tha, hruaitu nih tling, mi inngaitlawm leh khaw mipuiten an ngainat a ni. Kum 1925-ah Suakthangpuia fanu Liantini nen inneiin fa mi 3 leh hmeichhia 4 an nei. Kum 1943-ah Rengdil awptu, a patea ni bawk Tuahkima chu a thih ve tak avangin Zamuang chu a nau Malsawma kutah dahin Rengdil thut turin a phei leh ta a ni. Thankunga hi kum 1950 October thla khan kum 49 mi niin a thi ta a ni. A aiawh turin a fapa Lalzamanga chu lal a lo ni ve leh ta a, ani hi kum 1954-a lal ban a nih thleng khan Rengdil lal a ni.

            Thankunga hi mi thil thlir thui tak niin a hriat a, ram lo thang zel turah a chi leh kuang te, a khua leh tui te chu midangten an nekchep zo mai ang tih a hlau hle a ni. A unaute nen ram thar satin khaw thar an din zel a. Kum 1933-ah Saikhawthlir a din a, kum 1938-ah a thurawn angin a nau Rualkhuma’n Lokicherra (Zawlnuam) a din a, kum 1944-ah Rupiacherra a din a, kum 1946-ah Buksang a din leh a ni. Heng an khaw dinah hian a chi leh kuang mi tha, khua leh tui te awpkhawma roreltu tur a dah zel a ni.

Rualkhuma

            Zawlnuam khaw dintu Rualkhuma hi Darsata fa pahnihna niin March ni 28, 1904 khan Durtlangah a piang a. Durtlangah pawl 4 thleng a zir a, kum 1921-1924 chhung Assam Rifle-ah tangin Sylhet-ah a zuk awm a. A sipai bang lo haw hi Rengdila a pa hnenah lo hawin kum 1925-ah nupui a nei a, a nupui hian kum 1947-ah thihsanin nupui dang a nei leh a, fapa 8 leh fanu 11 a nei. Kum 1988 January ni 8 khan kum 84 mi niin Zawlnuamah a thi ta a ni. Ani pawh hi a pa te leh a u te ang maia sakhawmi, pa tum ruh leh rual el, rorel thiam leh khua leh tui te hmasawnna ngaihtuah mi a ni.

Zawlnuam luah tan dan

            Thankunga chuan Langkaih phaizawl, ram rem tha tak luah loha a awm reng a hmuhin a nau hnenah ser huan leh leilet siama khaw din turin a rawn a, chu chu kum 1938 a ni. Rualkhuma chuan a u thu angin Goboicherra-a Chawrai kristian te khaw din puiah a zu sawm a, anni pawhin an lo rem ti a. Tichuan bawrhsap Mc Call-a phalna la turin Aizawl a kal nghal a, Aizawlah hian R.Buchhawna leh a Khiangte pui dangten an lo \anpui bawk a. Bawrhsap chuan a pa te ho leh a u te chanchin a hriatin khaw din phalna chu a lo pe ta a ni.

            Hemi kum (1938) hian chhungkaw tlemtein thlawhhma lain Buklui hnar leilet zawlah bawk an khawh a, Krismas erawh chu Zamuangah an han hmang thung. Bawrhsap thu angin Januray ni 10, 1939 hma ngeia khaw thar an luah ngheh a ngai a, hei hi mission lamin an lo hriat veleh Langrawng bialtu Tirhkoh Lalbuaia chu Rengdil atanga insawn thla ve nghal turin an ti a. Tichuan kum 1939 January ni 6 (zirtawpni) ah Rualkhuma te chhung, Lalbuaia te chhung leh chhungkaw dang pathumin Lokicherra (Zawlnuam) hi an luah tan ta a ni. Hei hi Assam sawrkarin a lo hriat chuan ramngaw tha tak tak chu an chen phul zo mai ang tih hlauin, Langkaih phai ruam Reng ram neka khaw din chu a lo remti chiah lo a. Hemi sawifel tur hian Sylhet-a awm Conservator Forest leh Aizawl Bawrhsap chu Rualkhuma inah kum 1942 khan an inbia a, an thuthlukna angin khua chu a ding zui ta zel a ni.

 Zawlnuam Bawrai erawh hi Dokhama hoa kum 1923 atanga an lo luah tan tawh a ni. Chawngthu Vanchiau hnam, Lal Dokhama hi British-ho ruat Mizo Lal hmasa ber pawl a ni. Kum 1919 khan Mualthuam atangin Hachhek tlangah a insawn a. Kum 1923-ah Langkaih phai ruam bawhthlain Bawrai a din a ni. Bawraia a awm hnu hian a fapa upa ber Hrangchhunga chuan Maubawk chhuahsanin kum 1934-ah Hriphaw tlangah khua a din a. Dokhama pawhin finchhovin a aiah a fapa chu a laltir a, Bawrai pawh Hriphaw atangin a awpkhawm ta a ni. Zawlnuam Thuampui hi rambuai lai khaw sawikhawm khan Zawlpui atanga lo chhuk an ni. Tichuan kum 1987-a Mizoram sawrkar Town Declaration angin Langkaih phaia insi deuh thawa awm khaw pathum- Bawrai, Lokicherra leh Zawlpui grouping te chu Zawlnuam Town tia thlak a lo ni ta a ni (Govt notification No. LAD/VC/80/64 of Dt. 30th November, 1987). Lokicherra chu Zawlnuam Vengpui tih a lo ni ta a, Bawrai chu Zawlnuam Bawrai tih a niin, Zawlpui Grouping pawh Zawlnuam Thuampui tih a lo ni ta a (Govt notification No. LAD/VC/-26/80/55 of Dt. 25th June, 1987), Zawlnuam khawpui a lo piang ta a ni.

Heng an chanchin kan sawi tak khaw pathum- Rengdil, Zamuang leh Zawlnuam ah te hian, khaw dintu kan mi hmasa te meichher lo chhit tawh chu vawiin thleng hian mit lovin a eng zual zel ta zawk a ni. 

Thulaknate:-    (1) K. Thangzuala (L), Zawlnuam, Note bu leh Diary.

                        (2) Rengdil Kohhran Chanchin (1922-1993).

                        (3) Zamuang Kohhran Chanchin (1930-1993).          

                        (4) Zawlnuam Kohhran Chanchin (1939-1993).

                        (5) Lalhruaitluanga Ralte, Zoram Vartian (2008).

(He article hi Kum 2011-a ka ziah tan a ni a, chawlhsan lovin thudik zawk nia ka hmuhchhuah te a awm zel a, ka siamtha chho zel bawk a ni. Rualkhuma hi a ka pu K. Thangzuala pa a ni)