Aw Lal Isua Ang Turin

Lal Isua Jerusalem panna kawngzawh kha a radical (a huaisen thlak, a pa, a rorum) hle.

Jerusalem chhehvelah tum (palm) a awm lo, Jericho erawh tum khawpui (palm city) tih khawpa tum thing tamna a ni. Kawngzawh tur leh Isua hmuak turin Jerusalem atanga mipui an kal hum hum thu kan hmu lo. Chuvangin kawngzawhho kha Jericho, Bethany leh Bethphage thingtlang khaw mi te, Palestina leh Galilee ram bial hmun hrang hranga Isua rawngbawlna hretu (witness) leh chu Isua movement-in beiseina nei thei tura a chawhharh thar te an ni ang a. A awmzia chu Jerusalem pana Isua chawimawitu te kha hetiang ti tura a hranpa liau liau helai hmuna kalkhawm an ni. Chu chu Jerusalem-a Juda hruaitute tan chuan helna rim a nam tlat.

He kawngzawh hi uluk taka kan en chuan mipui chi hnih inbeihna boruak sa ru angreng tak kan hmu. Galilee leh Palestina ram thingtlang miretheiten Judai ram chunga thuneihna symbol, Jerusalem leh a chhunga chengte chu politics takin an su (challenge) a ni tih kan hmu ang. He Jerusalem khawpui ropui tak, thuneihna leh rorelna symbol hi a la chhiat vek tur thu sawiin Isua pawh a tap hial a ni.

Ni, Isua movement hi helna (revolution) a ni. Helna hi tharum thawh lo pawhin a awm thei tho tih kan hria a. Isua chuan Juda vantlang nuna a zatve hnuailama awm te tan harhtharna a thlen a, beiseina a siamsak a, a chawk tho a, chutih hunlaia an sakhua leh vantlang nun khirh em em mai chauh lo pawh, mipuite tan beisei tur a tha dang a awm a ni tih a hriattir a, he khawvela nun tha leh dik zawk mai bakah chatuan nunna a la tiam zui bawk a ni.

|henkhat chuan Good Friday chawlhkarah lungchhe vankaiin ‘Isua’n a dam chhunga chawimawi a hlawh ve na awmchhun a ni’ kan ti, ‘Pathianin keimahniah ropuina a chan theih  nan sabengtung anga tlawm turin’ kan inchah fo thin, a dik lo e ka ti lo. Ka sawi duh zawk chu Jerusalem-ah khan Isua kha engti turin nge a kal a, enge a va tih tak? tih hi a ni. Sakhua kawra hmanga dik lo taka mipui sum chhuhsaktu te a um darh a, an bungrua leh hmanrua pawh a tihdarh sak rem rum mai a nih kha. Hetah hian Isua Anti-Corruption Movement kan hmu. Kan tunlai hun atan pawh min cho na hle mai.

Tin, chu mai bakah, tlanna hna a thawh famkim nan, mi zawng zawngin chhandamna famkim an chan theih nan thi turin a kal a, sawisak tuara thisen chhuak turin a pan a ni. Tichuan, kraws-ah mihringin a tawrh theih zawng zawng tuar zovin kawng a zawh zo a, a taksa nunna leh thlarau pawh phel darhin a awm a, mihringin a zawh theih bak zawh zelin khawvel a ngam ta a ni.

Jerusalem kawngzawhah khan, Juda ten khawvel thil tak pawha an ngaihsan Davida, chumi thlaha mi Isua zuiin, a zuitu te chuan an nghahfak ram lo thleng tur neitu dik tak a nih thu hmangin an au rual a nih kha. Chu chu Jerusalem-a sakhua leh politics rorelna khawl vuantu lam tan chuan na ngeih ngawih tak a ni. A chhan pawh hemi hmalam daih atang tawhin heng mi te hi Isua nen hian tehkhin thu leh ngaihdan (philosophical-ideological parables) hmangin an lo inbei fe tawh a ni. Thua inbeihna mai bakah a rawngbawlna pumpui thlir hian Isua tanna lam side hi a lang chiang veng vawng hle.

A hunlai thil awmdanin a zir nge ka hre lo, Isua khan Galilee bial thingtlang khaw te tak te te ah a hun tam zawk a hmang. Juda fir hovin an hmuhsit em em ram bial atangin 'am-ha-aretz' (people of the land) sangha mantu, chhiahkhawntu, zealot pawla mi tih vel a khawm a. Juda danin a pawm theih miahloh uire, nawhchizuar, ramhuai pai tih vel a khawm bawk.

Zana a ruk deuh roha amah pantu Pharisai pawla mi Nikodema leh, Arimathai khuaa mi Josefa bak kha 'first class citizen' thiantha han kawmngeih deuh midang a nei lo emaw ni aw?

Khatih hunlaia Palestina ramah khan rilru leh taksa natna kha a tam zual emaw tih mai tur a ni; chu a chhapah mahni emaw, nu leh pa emaw tihsual rah chhuah niin an ngai bawk, mahse Isua chuan nat tinrenga na a tidam si thin.

Isua khan mi hnuaihnung (bottom class people) beisei tur pawh hre tawh lo te kha beiseina nung a siamsak a, mihring nun thar a pe bawk. Thlarau damna leh, he khawvelah ngei pawh Pathianin mi tinreng hi duhtaka a siam an nih ang ngeiin, chu mihring chuan a nihna dinhmun dik tak a luah theih nan nasa takin a thawk a ni.

Duhsak hlawh loh te hi kan hlau a, changkan kan tum a, lansarh kan lo duh bawk nen, rual kan el luat aleiah kan chhia leh tha hriatna te hi kan bum kan bum mai zawng a nih hi maw. Chutianga kan thlek kawi mai mai lai chuan kan unau tam tak te erawh chu mahnia tho chhuak thei hauh lo khawpin an bet mek a ni. Thingtlang hmun hrang hrang te hi han thlir ila, kan ram politics-ah pawh Pathian politics kan kalpui a hun tawh a ni lawm ni?

Corruption kan ngaihdan te, kan hna zawn dan leh hna kan hmuh dan thleng hian ngaihtuah nawn ngai awmin ka hria. Kan ngaihtuah fo tur chu – ‘Isua ni se hei hi engtinnge a tih ang?’ tih hi a ni. Hnathawhna kawngah emaw, hna zawnna kawngah emaw, tihdan phung pangngai pel deuh kan hmaah remchang lo inchhawp se ‘mi tih dan tho a alawm’ tiin kan inthiamchawp a, kan insawipui a, a lehlingin pathian malsawmna kan ti daih mai thin. Zerphyr Drama Club show ‘Engkimtithei’ tih drama kha kan ena kan hriat ka ring, ngaihtuahzui nawn tlak thil tam tak a awmin ka hria.

Isua khan a rawng (colour) dik tak a tilang (show) tluan chhuak parh, a dum chu a dum, a var chu a var a ni tawp mai, A nunah khan rawng inchawhpawlh leh rawng tial a awm lo. Amah ringtu leh zuitu kan nih si chuan hmabak sut (challenge) tur kan ngah hle mai a. Dawihzep taka lehlama awrdum lehlama awrsen lah chu a thiang hauh si lo.

Kan tih tur a chiang ta hle mai. Nazareth Isua rawngbawlna leh a rawngbawl dan kha kan tan example tha mi ni se, amah Isua ngei hi kan entawn tur idol, kan role model ni se. Kan Zoram khawvelah hian, 'Aw Lal Isua ang turin' tih hla hi, a 'action' zawngin i sa ang u khai.