Pathian Thu Zirna Kawnghmang : Career Guidance In Theological Education

Pathian thu zirna lama mi tui tak tak te leh Pathian thu zir tura inbuatsaih mek te, midang tana tangkai tur leh kawng kawhhmuh thei lam, zau zawka Pathian rawngbawl tura inbuatsaihna atana thil tul tak ni si, Pathian thu zirna kawng hmang lam hi Mizotawng ngeia ziaka dah tulin ka hre ve tlat a. Tum khat chu kan Branch KTP-in Diamond Jubillee a lawmna Souvenir-ah ka thailang tawh nghe nghe. Thalai la naupang zawk, helam hawia rilru puahchah mekte tan a tangkai mial takin chutiang lam hawi chu chhawpchhuah ka’n tum dawn a ni. Tin, kohhran mi nawlpui pawhin Pathian thu zirna kawng hmang lam hi kan ngaihtuah tam vaklo maithei a. Nu leh pate tan pawh fate career ngaihtuahna kawngah puitu a ni thei bawkin ka ring.

India rama Pathian thu zirna khaikhawmtu

India ramah chuan college leh university zawng zawngte hi University Grant Commission (UGC) hnuaia inthlungkhawm vek an ni a; UGC thuneihna, dan leh hrai hnuaia enkawl an ni. Chutiang bawk chuan India rama Pathian thu zirna hi hlawm lian tak pathumah an inthlungkhawm a, chungte chu Senate of Serampore College/University (SSC/SU tiin sawi mai ila), Asia Theological Association (ATA) leh Roman Catholic Kohhran hnuaia zirna te hi an ni. Roman Catholic-ho Pathian thu zirna hi anmahni Kohhran mi vek lo chuan kan bawh lem lo a. ATA hnuaia zirna hian evangelical lam a hawi deuh hlekin a hriat a. Tin, mahnia inrelbawlna nei hrang leh ram pawn lam te nena inthlunzawm Pathian thu zirna pawh tawk fang chu a awm. Heng zirna te hi an tha em em vek a, mahse kan Kohhran chuan SSC hnuaia zir chhuak nilo hi chu kan pawm lo (pastor atan pawh ordain theih loh) a ni. Chuvangin SSC hnuaia zirna bik hi kan sawi ber tur a ni ang.

Senate of Serampore College (University) chu enge ni

          Serampore College hi India rama Danish ho colony/awmna hmun West Bengal-a Serampore (Shri Rampur) hmunah kum 1818 khan missionary pathum William Carey, Joshua Marshman leh William Ward ten secular college atanga bultanin an din a. Kum 1827-ah Denmark lal Federick VI-na chuan mahnia ding College Council hnuaia university nihna leh thuneihna pein, Royal Charter hnuaiah dah a ni a. Kum 1858 khan Calcutta University din thar hnuaiah affiliate nghal a ni a. Kum 1883 khan arts section bik chu khar a niin Baptist Churches of Bengal hnuaiah christian training institution pakhat angin engemaw chen chu kalpui leh a ni a. Kum 1910 atang khan nasa taka siamthat leh thuamchakin hma pawh a sawn chho chak hle a ni. Calcutta University hnuaiah affiliation pawh tih thar leh a ni a. kum 1911-ah Intermediate of Arts affiliate a ni a, 1913-ah B.A., 1924-ah B.Sc. affiliate a ni bawk.

            Chutiang a nih mek lai chuan Pathian thu zirna lam pawh kum 1915 atanga hma la tan chhoin kum 1916-ah Licentiate in Theology (L.Th.) hawn tan a ni a. He college kum 100-na, kum 1918-a Bengal Legislative Assembly-in Serampore Act 1818 leh College Council thuneihna a pawmpui hnu phei chuan Asia khawmualpuia theological university lian ber pawl a ni chho ta a ni.

Senate of Serampore Act 1818 hnuaiah hian College Council leh Senate member turte chu India rama Serampore College/University pawmtu Kristian pawl, Kohhran leh theological college hrang hrang atangin ruat thin a ni a, chung Council leh Senate member-te chuan SU hi an enkawl ta a ni. He Act hi university ni tura Serampore College a nemngheh avang leh Senate Constitution a buatsaih avangin a pawimawh hle a. Article 11-na chuan Senate chu zir tur course-te duang a, exam buatsaih dan turte rel turin a ti a, Senate chu Council-in degree-te, diploma-te leh certificate-te a pek turah zirlaiten an hlen tur thilte duang turin thuneihna a pe a ni. Council hian university a nihna thuneihna hmangin diploma atanga doctorate thlengin degree a hlan thei ta a ni. Kan Kohhran pawh hian SSC inrelbawlnaah hian hmun pawimawh tak kan luah mek zel a ni.

Tun dinhmunah SSC hnuaiah hian affiliated college sawmnga chuang (57) vel zet a awm a, chungte chuan zirna course hrang hrang an kalpui hlawm a, an course pek theih erawh a in ang vek lo. A thenin correspondence course/certificate/diploma chiahte an kalpui theih laiin thenkhat chuan B.D. chauhte an kalpui a, M.Th. leh D.Th. chauh kalpui te, a vai deuhthawa kalpui theite an awm. Zirtirtu tur, hmunhma leh building, library, sum leh pai dinhmun azirin college hrang hrangte dinhmun hi a inthlau hle. Heng zirna hrang hrang programme a vai deuhthawa kalpui thei tlemte zingah ATC hi a tel ve mek a ni. College hrang hrangte chu:

(1) Academy of Integrated Christian Studies (AICS), Aizawl, Mizoram
(2) Allahabad Bible Seminary, Allahabad, Uttar Pradesh

(3) Aizawl Theological College (ATC), Aizawl, Mizoram

(4) Andhra Christian Theological College, Hyderabad, Andhra Pradesh

(5) Baptist Theological College, Pfutsero, Nagaland
(6) Bethel Bible College, Guntur, Andhra Pradesh

(7) Bethel Bible Institute, Danishpet, Tamil Nadu

(8) Bishop’s College, Kolkatta, West Bengal

(9) Calcutta Bible Seminary, Kolkata, West Bengal

(10) Calvin Institute of Theology, Sriperumbudur, Tamil Nadu

(11) Christian Theological Seminary, Chunnakam, Sri Lanka
(12) Clark Theological College, Mokokchung, Nagaland
(13) Concordia Theological Seminary, Nagercoil, Tamilnadu
(14) Dharma Jyothi Vidya Peeth, Faridabad, Haryana

(15) Eastern Theological College (ETC), Jorhat, Assam
(16) Faith Theological Seminary, Adur, Kerala
(17 ) Federated Faculty for Research in Religion & Culture (FFRRC), Kottayam, Kerala
(18) Gossner Theological College, Ranchi, Jharkhand
(19) Gujarat United School of Theology, Ahmedabad, Gujarat
(20) Gurukul Lutheran Theological College, Chennai, Tamilnadu
(21) Harding Theological College, Tura, Meghalaya
(22) Indian Theological Seminary, Chennai, Tamilnadu
(23) John Robert’s Theological Seminary (JRTS), Shillong, Meghalaya

(24) Karnataka Theological College, Mangalore, Karnataka
(25) Kerala United Theological Seminary, Thiruvananthapuram, Kerala
(26) Leonard Theological College (LTC), Jabalpur, Madhya Pradesh

(27) Madras Theological Seminary & College, Chennai, Tamil Nadu

(28) Malankara Syrian Orthodox Theological Seminary, Mulanthuruthy, Kerala

(29) Manipur Theological College, Kangpokpi, Manipur

(30) Mar Thoma Episcopal Jubilee Institute of Evangelism, Tiruvalla, Kerala
(31) Mar Thoma Theological Seminary, Kottayam, Kerala

(32) Master’s College of Theology, Visakhapatnam,
(33) Mennonite Brethren Centenary Bible College, Shamshabad, Andhra Pradesh

(34) Methodist Bible Seminary, Vasad, Gujarat
(35) New Theological College, Dehra Dun, Uttaranchal
(36) North India Institute of Post Graduate Theological Studies (NIIPGTS), Serampore, West Bengal
(37) Orissa Christian Theological College, Ganjam, Orissa
(38) Orthodox Theological Seminary, Kottayam, Kerala
(39) Santal Theological College, Benagaria, Jharkhand

(40) Serampore College, Serampore, West Bengal

(41) Southern Asia Christian College, Chennai, Tamil Nadu

(42) St. Thomas Orthodox Theological Seminary, Kalmeshwar, Maharashtra
(43) St. Andrew’s Theological College, Dhaka, Bangladesh

(44) Tamil Nadu Theological Seminary (TTS), Madurai, Tamil Nadu

(45) Theological College of Lanka, Pilimatalawa, Sri Lanka
(46) Trinity Theological College, Dimapur, Nagaland
(47) Trulock Theological Seminary, Imphal, Manipur
(48) Union Biblical Seminary (UBS), Pune, Maharashtra
(49) United Theological College (UTC), Bangalore, Karnataka
(50) United Theological School of Maharashtra, Pune, Maharashtra

Pathian thu zir turin enge tul

            Pathian thu hi tupawhin a duh phawt chuan a zir thei a, amaherawhchu mi tam zawkin an zir chhan hi chu rawngbawl zel tura inbuatsaihna atan niin a lang. Chutiang anih avang tak chuan Pathian thu zir tur hian Kristian mi piangthar tha tak, nun nghet hi qualification hmasa ber niin ka hria. Tin, Pathian thu pawmdan nghet tak nei, ngaihtuahna zau, kawng hrang hranga thil thlir thiam, ngaihdan insualbuai karah pawh mahni dinna fumfe tak nei chunga mi dangte ngaihdan zahsak thiam mi nih pawh a tha khawp mai.

            A bik takin residential course heng B.D. (Bachelor of Divinity), M.Th. (Master of Theology) leh D.Th. (Doctor of Theology) te hi hi tihtur tam tak a awm thin a, chuvangin rilru mai bakah taksa hrisel pawh a ngai khawp mai. Season tluana awl awm mang loa zirlai buaipui a ngaih thin avangin natna benvawn leh chaklohna bik neite tan chuan a hautak thuahhnih bik thin a ni. Hei vang hian a ni ang e, India rama theological college tam zawk pawh hian an college-a zir tur an lak hian an hriselna dinhmun enfiah hmasa vek lo chuan zirlai an la ngai manglo a ni.

            Thiamna ngai (educational qualification) zat hi zir tur course azirin a inanglo. B.D. hi Pathian thu zirna lama a kakpui, pengthuam pawimawh lai ber a ni. B.D. zo chin hi Kohhran tam tak, kan Kohhran pawh huamtelin rawngbawltu nghet (ordain minister/pastor) a pawm theih chin a ni. M.Th. leh D.Th. zir zel duh tan pawh B.D. tha taka zawh phawt a ngaih bakah B.D. result-in a hril thui hle a ni.

            Kum 2009 khan SSC-in B.D. regulations leh syllabus a duang tha a. Chu regulation thar chu kum 2010 atanga hman tan a ni. He regulation thar ang chuan B.D. hi kum 5 zir tura duan niin a zir thei tur chin pawh Pawl 12 (arts/science/commerce) pass chin tih a ni. He dan thar anga course siamah chuan a kum khatna zirlai hengte hi an ni a: english, sociology, psychology leh philosophical foundation paper 2 theuh (college leh senate examined 1 ve ve theuh) a ni a. Heng subject tlangpui hi zirna tluang pangngai (secular college) lamah graduate/post-graduate level-a elective subject tlanglawn tak a ni a. Chuvang chuan graduate/post-graduate zo tawhte tan chuan kum 5 zir ngai loin entrance test paltlangin a kum 2-na atanga zir tan theih tura ruahman a ni a, hei hi college tam zawk kalpui dan a ni. He dan anga B.D. zirna kalpui tan chuan kum 5 zir tur kha a kum khatna zir a ngai ta lo a, zirlaite pawh an luh kum atanga kum 2-na zirlai zirtir nghal an nih avangin kum 1-na atangin B.D. II an ni nghal ta a, kum 5 course chu kum 4-ah a zawhfel theih ta a ni.

Kum 2013 atangin  SSC-in B.D. regulations leh syllabus ennawnin a duang tha leh a. Chu regulation thar chu kumin 2014 atanga hman tan a ni. Thil danglam lutuk chu a awmlo nangin a year hming pek dan siam danglam a ni a. B.D. kum 5 course-ah a kum khatna chu orientation year tih a ni a, kum 4 dang nen kum 5 zir tur tho a ni a, entry grade pawh Pawl - 12 pass tih a ni. Kum 2-na atangin B.D. I tih an ni chauh ta a ni. Course thara orientation year zirlai hi course hluia B.D. I zirlai nen a danglam tam lo. Thil inang awm chu course hluia graduate/post-garduate zo tawhten kum 5 zir ngai loa entrance test paltlanga a kum 2-na atanga zir tan theih ang bawkin, course tharah pawh chutiang mite tan chuan orientation year zir kher ngai loin B.D. I atanga zir theih tura ruahman a ni. Kum 5 course chu kum 4-ah a zawhfel theih a ni tho a nih chu. Hei hi ATC kalpui dan a ni. Hetih lai hian pawl 12 entry-a kum 5 zir tura B.D. zirna kalpui college hi India ram hmun dangah an awm nual.

Rawngbawlna hi thiamna sang tak neih avanga pawngtawng zuam ngawt a him lo ang. Keimahniin uluk taka ngaihtuahin, Pathian rawn chung zelin, kohna kan dawn ang zia zelin thuthlukna felfai tak kan siam tur a ni ang. Thil hrang hrang dai hnem (experience) pawh a tangkai thei a ni. Chuvangin kei ka mimal duhdan chuan, kum naupang lutuka Pathian thu zirna pawl 12 atanga luhchilh aiin, secular lama graduate/post-graduate hnua zir leh hi a thlanawm zawkin ka hria. Miin kum 6-ah pawh sikul lut tan sela, tluang taka a zir chuan UGC leh SSC dan ang thlapin kum 28-30 velah M.A. B.D. M.Th. a zo vek thei a. Kohhran enkawl hna leh Pathian rawngbawlna kawng dang zawh tur pawhin hei hi a tha tawk hle a ni. Tunlaiah khawvel thiamna a sang chho ve zel a, mihring khawsak phung a changkang zel a, Kristianna leh Kohhran nawktu thil hrang hrang pawh a tam tawh hle a, a la tam dawn chauh a ni. Chuvangin rawngbawltuten (thlarau lama hmasawn zel chu sawi ngailoah dah ila) khawvel thiamna leh Pathian thu thiamna lama hma an sawn ve zel pawh a tul em em a ni.

Eng degree-te nge zir theih

SSC hnuaia college-ah te hian degree/course hrang hrang a zir theih a. Thiamna bik ngailo, mi tupawh, eng sakhua zuitu pawhin an zir theih Diploma in Christian Studies (Dip.C.S.) atanga a vawrtawp Doctor of Theology (D.Th.) thleng a zir theih a ni. Pathian thu zir tur hian eng level-ah pawh kum bithliah (age bar) a awm lo a, mi tupawhin a zir tura thiamna neih ngai a neih a, entrance exam leh interview a qualify phawt chuan zir theih a ni. Chung degree/course hrang hrang, Mizote pawhina kan lo zir ve thin tlangpuite chu hetiang hian lo sawizui ta ila.

Awmchilh ngai degree-te (residential course)

Kan hriat lar ho heng B.Miss., B.Th., B.D., M.Th., leh D.Th. te bakah hian kan bawh lutuk loh, Diploma in Clinical Pastoral Counseling (Dip.C.P.C.) hi internal study programme (awmchilh ngai) an ni.

Bachelor of Missiology (B.Miss.)

Mission hna lama tui mi tan B.Miss. zir theih a ni a. Kum 18 chung lam, Pawl 12/PUC pass tawhte emaw; kum 25 chung lam Pawl 10 pass hnua kum hnih tal zirna dang engemaw lo chhunzawm tawh emaw, eng hna ber emaw kum 2 tal lo thawk tawh, rawngbawlnaa kum 2 tal lo inhmang tawhte tan zir theih a ni a. A zir tur hian entrance test leh interview erawh qualify a ngai thung. Kum thum chhung zir tur a ni a, kum nga thleng pawhsei theih a ni. SSC-in a pawmpui angin English bakah heng \awng: Hindi, Bengali, Odiya, Telgu, Tamil, Malayalam, Kannada, Marathi, Gujarati, Santhali, Mizo leh Ao te hian zir theih (college lamin an kalpui theih chuan) a ni.

B.Miss. hian mission rawngbawlna lam a focus lian ber a. Kan Kohhran Synod Mission Board enkawl, Mission Vengthlanga Missionary Training College (MTC- tun hmaa Missionary Training Centre ni thin) hi SSC lam pawhin affiliation a pe fel tawh a. Tun mekah India rama B.Miss. zir theihna college 3/4 emaw lek zinga hmasawn chak ber pawl a ni. Tin, B.Miss. zo tawhte tana B.D. upgradation zirna kalpuileh dan tur pawh kawng a kuak thuai a beiseiawm hle.

Bachelor of Theology (B.Th.)

B.Th. zir tur hian pawl 12 emaw, a tlukpui leh chunglam pass a ngai a. Kum 3-4 (a college a zirin) zir a ni a, Mizorama theological college kan neih pahnihte hi chuan B.Th. course hi an pe tawh lo, India ram hmun dangah an la pe nual. B.Th. zirna hi SSC chuan a kalsan hret hret lam chu a ni ber e.

Bachelor of Divinity (B.D.)

B.Th. zir zo tawh te hian B.D. an zir zawm duh anih chuan an tih that dan azirin B.D. course zawng zawng an zir leh vek a ngai tawh lo. First leh second class-a pass-ten B.D. kum 4-na zawmin kum 2 an zir ve leh ang a, third class-a pass-ten B.D. kum 3-na zawmin kum 3 an zir ve leh ang. Mahse hei hi an zir duhna college-a entrance exam leh interview-te an paltlang chauhin a theih a ni. Bible lo zir tawh an nih avangin entrance exam-a Bible knowledge an exam ve a ngai tawh lo a, english leh general awareness/knowledge erawh an qualify ve a ngai.

B.D. hi zirna tluang pangngai atang chuan pawl 12 pass (kum 5 course) leh arts/science/commerce-a graduate/post-graduate-te tan (kum 4 course) zir theih a ni a. ATC leh AICS te hi chuan graduate entry 4 year course hi B.D. zirna an kalpui dan a ni. B.D. admission hmu turin mahni zir duhna college-a entrance exam leh interview-te paltlang a ngai tlangpui. Entrance exam-ah hian Bible knowledge, english leh general awareness/knowledge-te qualify a ngai thin.

Kum 2009-a SSC-in B.D. Curriculum a duan tharah chuan B.D. (kum 4 course) tha taka zo a, degree dawng thei tur chuan paper/subject sawmnga bawr vel, practical exposure/work pali (4) leh thesis-ah te 40% aia hniam lo mark hmuh a ngai a ni. Kum 2014-a course siam tharah Paper/subject hi tlema sawrzim hret a ni. Engpawhnise semester khat (kum/session khatah semester 2 a awm) thla 5 vel chhungin paper/subject 6 emaw 7 emaw vel zir zawh a ngai ta thin a ni.

B.D. Subject/paper zawng zawng chu Cluster 5-ah then a ni a, a kalhmang tlangpui chu hetiang a ni.

Cluster I: biblical cluster – Thuthlung thar leh Thuthlung hlui zir bingna, Bible chanchin, kalhmang leh a hrilhfiah dan, Bible ziakna tawng greek leh hebrai tawng zirna.

Cluster II: theological cluster – Theology kalphung hrang hrang, thurin (doctrine) lam, mipui vantlang nun nawktu thil chi hrang hrang zirchianna (social analysis) leh nun dan phung leh ngaihdan dik (ethics) lam.

Cluster III: religious cluster – Sakhua hrang hrang chanchin, hnam hrang hrang chanchin leh nun dan lam.

Cluster IV: history-mission cluster – Hun hmasa atanga Kristian sakhua leh Kohhran chanchin, mission rawngbawlna chanchin leh a kalpui dan lam.

Cluster V: ministry cluster – Kohhran rawngbawlna leh enkawl lam, kohhran mipuite mamawh phuhruk leh tanpui dan kawng (pastoral ministry), mihring inlaichinna leh inbiakpawhna, inthenawm khawvenna (christian communication) lam. Cluster V hian subject discipline inzul deuh leh hrang deuh hlek subject/paper pakhata dahkhawm, Integrated leh Inter-disciplinary course lamte a huam bawk. 

Diploma in Clinical Pastoral Counseling (Dip.C.P.C.)

Dip.C.P.C. hi B.Th./B.D. zo tawh Pastoral Ministry-a kum 3 lo thawk tawh emaw, B.A./B.Com./B.Sc. pass tawh, Pastor rawngbawlna nilo Kohhran rawngbawlna kawng danga kum 3 tal lo inhmang tawh te tan entrance exam leh interview paltlanga zir theih a ni. Kum 1 chung zir a ni a, engemaw harsatna vangin kum 2 thleng pawhsei theih a ni. A course hming ang hian midangte harsatna tanpui/counselling lam an zir deuh chawt a ni. Tun meka Dip.C.P.C. zir theihna te: Christian Medical College & Hospital, Vellore; Christian Medical Association of India, New Delhi; Thomas Mar Athanasius Institute of Counselling, Kottayam;  Life Enrichment Counselling & Training Centre, Thodupuzha East, Kerala; Mar Thoma Hospital Guidance and Counselling Centre, Thiruvananthapuram te an ni.

Master of Theology (M.Th)

B.D. leh Bachelor of Christian Studies (B.C.S.) result-ah a vaia khaikhawm (aggregate) leh mahni zir duh subject-a grade B (60%) hmu pa chin ten M.Th. hi zir theih a ni a. Thuthung thar, Thuthlung hlui leh Kristian theology zir turin B.D. level-a language (greek/hebrew) subject-ah grade B hmuh a ngai bawk, Tin, Religion zir turin Hindu sakhua zir bing duh tan Sansrit, Islam tan Arabic, leh Bhudism tan Pali tawng qualify a ngai bawk. Heng branch, missiology, history of christianity, christian communication, christian ethics, social analysis leh women studies-ah te chuan heng language requirement kan han sawi tak te hi a ngai tawh lo. Tun dinhmunah chuan SSC hnuaiah hian kan han sawi tak subject hrang hrang te khi a zir theih a ni.

M.Th. pawh hi B.D. ang tho khan an zir duhna college-ah entrance exam an paltang a ngai a ni. Entrance exam-ah hian english leh mahni zir tur subject theuh qualify a ngai bawk. M.Th. hi kum 2 zir a ni. Secular graduate atanga B.D. zo mipa tan M.Th. zir turin B.D. result chhuah nghah phawt a ngai thin a, kum khat chawlh a ngai tihna a nih chu. Hmeichhia leh B.Th. atanga B.D. zo ten M.Th. an zir duh erawh chuan B.D. an zawh kumah an zir nghal thei a. Amaherawhchu B.D. result-ah qualification ngai hrang hrangte an pha lo anih chuan an M.Th. admission an hmuh tawh kha cancel leh tur a ni. 

Doctor of Theology (D.Th.)

          D.Th. zir tur hian M.Th. level-ah grade B hmuh phak a ngaih bakah, SU buatsaih Common Entrance Test (CET) qualify a ngai bawk. D.Th. ah hian kum 4 atanga kum 7 inkarah assessment, doctoral research leh dissertation-te, viva voce zawng zawng nen zawhfel hman tur a ni. A tlangpuiin D.Th. zirlaite hian a kum 1-naah paper 3 (word 15000 vel) SSC hnuaia Department of Research / South Asia Theological Research Institute (SATHRI tia kan hriat lar) an thehlut tur a ni a, chu chu uluk taka endik (assess) a nih hnuah pawm a nih chuan an doctoral dissertation proposal an buatsaih thei chauh a ni. Amaherawhchu zirlaiin kum 2 ral hnu pawha assessment course a zo fel theilo a nih chuan a zirlaite tihtawpsak theih a ni.

SU hian kum khatah CET hi vawi 2 vel a buatsaih thin a, D.Th. zir duhten CET an paltlang theih chauhin admission an hmu ang. CET-ah hian paper I leh II an exam thin a, paper I ah hian a diltuin a zir duh subject-a methodological skills a neih dan leh a subject a hriatchian dan tilang thei tur lam zawhna an zawt tlangpui. Paper II ah hian book review (publish thar) leh diltuin research a beih dan tur kalhmang lam zawhna an zawt tlangpui bawk. Tin, SSC hnuaia Deptt. of Research / SATHRI-in a buatsaih D.Th. Research Methodology Seminar Course paltlang a ngai bawk. Heng thil tul pahnihte hlen chhuak thei chu D.Th. zir tura register theih chauh a ni. Pathian thu zirna lama doctorate degree neih hi a hautakin a awl ai lo hle a ni.

Tun mekahah SSC hnuaiah hian doctoral research centre pariat a awm a. Heng centre-te hi college malin emaw, college engemawzat insuihkhawmin emaw an din a ni thei. SSC hnuaia Committee for Reaserch-in doctorate zirna tlak tura thil tul nei nia a ngaih leh a pawmpuite zingah kan Kohhran ta leh enkawl ATC pawh hi kum 2013 June thla atang khan doctoral research centre atan hlankai a lo ni ve ta a. India hmarchhaka a awmchhun a nih bakah, India ram pumah missiology subject bika doctorate zir theihna awmchhun a lo ni ta bawk a ni.

                            

Awmchilh ngailo degree-te (non-residential course)

            Non-residential course chu external study programme (distance/correspondence course) a ni deuh ber ang chu. Zirna hmuna awmchilh ngai lo a ralkhat atanga zirna kalpui theih tura ruahman a ni. Hetiang hian tawi te te in han sawi dawn ila:

Diploma in Christian Studies (Dip.C.S.) leh Diploma in Bible Translation (Dip.B.T.) hi pawl 12 pass te tana zir theih a nih rualin, kum upat dan leh hna lo thawh tawh dan/experience azirin pawl 8 pass-te tan pawha zir theih dan kawng a awm. Kum 2 chung zir tur a ni a, harsatna bik engemaw vangin kum 4 thleng pawhsei theih a ni. 

Bachelor of Religious Education (B.R.E.), Christian education (Sunday school, vocational Bible school, etc.) lam zirna bik a ni.

Bachelor of Christian Studies (B.C.S.) hi  B.A./B.Com./B.Sc. zo tawh emaw, Dip.C.S. emaw, B.Th. emaw zir zo tawhte tan a zir theih a. Kum 4 chhung zir tur a ni a, mahse hei pawh hi harsatna bik a awm a nih chuan kum 7 thleng pawhsei theih a ni. 

Dip.C.S. leh B.C.S. te hi correspondence course an nih avang hian hnathawk chunga zir a rem em em a, Kristian puitling tawh tan pawh Pathian thu hriat leh zirbingna lama kal zel duh tan a tangkai em em a ni. SSC pawmpuinain mahni hnam tawng (regional language) a zir theih dan kawng pawh a awm a. Tin, heng course tha taka zo te tan pawh B.D. leh M.Th. thlenga zir chhoh zel theih dan kawng a inhawng ve bawk a ni. Tun mekah hian ATC-ah Dip.C.S. leh B.C.S. zirna hi kalpui a ni a, Inrinni-ah class an kal thin, college library pawh Inrinni hian an tan hawn a ni thin. Kum tin zirlai engemawzat an awm ve reng a, sawrkar hna lian tak tak thawkte pawhin an lo zir chhuak tawh a ni.

Master of Christian Studies (M.C.S.) hi B.C.S. leh B.D. zo tawh, rawngbawlna lama kum khat tal lo inhmang tawh te tan zir theih a ni. Kum thum zir tur a ni a, engemaw harsatna bikah kum nga thleng pawhsei theih a ni. M.C.S. hi regular course a ni lo a, post-graduate course ni ve tho mahse M.Th. tlukpui anga ngaih chi a ni lo.

Master of Ministry (M.Min.) leh Doctor of Ministry (D.Min.) te hi B.D. leh B.C.S. zawh hnua kum hnih tal full time rawngbawlnaa inhmang mek te tan, an thawhna Kohhran/pawl remtihnain zir theih a ni a. Rawngbawlna hna an thawhna chungchang bik entrance exam erawh an paltlang ve a ngai. Pastor/minister thawk lai mek te, service rei tawh te, tlema kum upa lam te tan intuaihriamna leh master/doctorate degree an neih theihna tur atana external study programme a ni ber mai.

Chawimawina degree (honoris causa) / Doctor of Divinity (D.D.)

            D.D. hi honorary degree a ni a, hei hi chu zir lam niloin chawimawina dawn chi a ni. Mi special bik, entirnan vantlang leh ram pum tana hnatawk tha te, thuziak/lehkhabu tha leh rotling ziak te, mi thiam leh inzirmi bik (scholar) te hnena an hnathawh hriatpuina, pawmpuina leh chawimawina a ni deuh ber e. Mizo zingah chuan Rev. Dr. Zairema khan D.D. hi a dawng a ni. Ani hi Pathian thu zirna lamah te, Bible lehlin leh zirchian kawngah Mizo kristiante tan a thawk nasa hle a ni.

Pawisa sen ngai zat

            Tunlai khawvelah zirna tha banphak tum tan chuan eng zirna pawh mai hi a man a sang tawh em em a, Pathian thu zirna lam pawh chutiang tho chu a ni.  India rama theological college dangte dinhmun ka hai vak hman lo a, ATC hi zirna man tlawmna ber pawl a ni chung hian B.D./M.Th./D.Th. zir nan a vaia chhutin kum khatah Rs. 40,000 vel bawr sen a ngai tlangpui. Heta tang hian India ram hmun dang leh foreign lama zir man tur vel chu kan suangtuah thiam mai awm e. Hetiang a nih avang hian chawmtu/sponsorship neih tha lo tan chuan a buaithlak ve hle thin. Amaherawhchu sponsorship leh scholarship hi a zawng peih deuh leh mi taima tan chuan beisei tur a thahnem ve hle bawk.

            Pathian thu kan zir duh a nih phawt chuan retheihna hi chhuanlamah kan hmang tur a ni lo. Pathian kohna kan dawng a, zir thei tura kan tling tawk anih phawt chuan bultan tawp phawt mai tur a ni. Pathianin a rawngbawl duh a thlahthlam lo ang tih ring ila, Jehova-Jire kan nei a lawm le.

UGC leh SSC

Kum 1956-a University Grants Commission Act hman tan a lo nih khan, UGC secretary hnenah SSC-in Royal Charter leh Act hmanga theological degree a lo hlan thinte pawm a nih theih dan chin zawhfiah a ni a. UGC chuan, ‘Serampore College chu Bengal Legislation (Act No. IV of 1918) in a lo remtih tawh angin Faculty of Divinity University a ni a. UGC Act Section 3-na anga UGC hnuaia Deem University a nih kher a ngai lo. SSC-in theological degree a lo hlan thinte pawh UGC Act Section 22 (3)-na in a sawi ang degree zingah a telloh avangin SSC kal zel dan turah pawh phuarna a awm hran lo’ tiin.  Tin, UGC hian SSC hnuaia theology zirna chu Bengal Legislature Act in a lo sawi tawh angin, dan ang thlapa din leh amaha theological degree pe theitu a ni tih pawh a hmuhpui bawk a ni.

Zirna tluang pangngai (secular education) nen a inlaichinna

          Heng a hnuaia university-te hian SSC hnuaia B.D. zir chhuakte hi secular graduate (B.A./B.Com./B.Sc.) an ni kherlo a nih pawhin an B.D. degree hi M.A. zir nan (entrance exam an paltlang chuan) a pawmsak thei a ni.

(1)         Kakatiya University, Warangel, Andhra Pradesh

(2)         Osmania University, Hyderabad, Andhra Pradesh

(3)         Gauhati University, Assam

(4)         M.S. University of Baroda, Gujarat

(5)         University of Ranchi, Jharkhand

(6)         R.D University of Jabalpur, Madhya Pradesh

(7)         Vikram University, Ujjain, Madhya Pradesh

(8)         Nagpur University, Maharashtra

(9)         North Eastern Hill University, Shillong, Meghalaya

(10)     Nagaland University, Kohima, Nagaland

(11)     University of Mysore, Karnataka

(12)     Calicut University, Kerala

(13)     Mahatma Gandhi University, Kottayam, Kerala

(14)     University of Kerala, Trivandrum, Kerala

(15)     Kanpur University, Uttar Pradesh

(16)     University of Calcutta, West Bengal

(17)     University of Burdwan, West Bengal

(18)     Vishva Bharti University, Shantiniketan, West Bengal

SSC hnuaia Pathian thu zirna ram pawn lamin an pawm dan

          SSC hnuaia Pathian thu zirna degree-te hi heng a hnuaia foreign university-te hian an pawmpui a, kan Kohhran theologian-te zingah heng university thenkhat atanga doctorate degree la pawh an awm nual tawh a ni.

(1)      University of Melbourne, Australia.

(2)      Copenhagen University, Denmark.

(3)      Sorbonne University, France.

(4)      University of Hamburg, Germany.

(5)      Ludwig Maximillians University, Munich, Germany.

(6)      University of Regensburg, Germany.

(7)      Friedrich Alexander University, Erlangen, Germany.

(8)      Georg-August University, Goettingen, Germany.

(9)      University of Auckland, New Zealand.

(10)  SEAGST, Philippines.

(11)  University of Cape Town, Republic of South Africa.

(12)  University of Birmingham, UK.

(13)  University of Lancaster, UK.

(14)  Leicester University, UK.

(15)  University of London, UK.

(16)  University of Sheffield, UK.

(17)  University of Durham, UK.

(18)  University of Kent, UK.

(19)  Oxford University, UK.

(20)  Cambridge University, UK.

(21)  Coventry University, UK.

(22)  British Open University, UK.

(23)  Union Theological Seminary, New York, USA.

(24)  Lutheran School of Theology, Chicago, USA.

(25)  West Minister Theological Seminary, Philadelphia, USA.

(26)  Fuller Theological Seminary, Pasadena, USA.

(27)  The International University, Missouri, USA.

(28)  McCormick University, Chicago, USA.

(29)  Princeton Theological University, USA.

(30)  Talbot Theological Seminary, USA.

(31)  Columbia International University, USA.

(32)  Dallas Theological University, USA.

(33)  Trinity International University, Illinois, USA.

(34)  Asbury Theological Seminary, USA.

(35)  Fordham University, USA.

(36)  Orthodox Theological University, New York, USA.

(37)  Drew University, Madison, USA.

SSC-in college/university degree a pawmsakte

SSC hian heng a hnuaia college/university atanga zirchhuakte leh an degree-te a case azirin hetiang hian a pawmpui (partial recognition) ve bawk.

(1)         ATA, Korea - M.Div.

(2)         ATA, India - B.Th., M.Div.

(3)         Australian College of Divinity - L.Th.

(4)         Australian College of Theology - M.Th.

(5)         Bristol University - B.A.

(6)         Burma Divinity School - B.Th.

(7)         Cambridge University, U.K. - B.A., Tripos in Theology, BA (Hons.)

(8)         Central Philippines University - B.Th.

(9)         Chicago University - S.T.M.

(10)     Copenhagen University - Cand. Theo.

(11)     Damascus Nile Theological College, Sudan - B.A., B.Th.

(12)     Dharmaram Vidyakshetram, Bangalore - M.Th.

(13)     Gregorian University, Rome - Master of Sacred Scriptures

(14)     Hebrew University - Master of Sacred Scriptures

(15)     INS Examinations

(16)     London University, U.K. – Matriculation, Diploma in Theology

(17)     Madurai Kamraj University, Madurai - Post Graduate Diploma Course in Communication

(18)     Melbourne College of Divinity, Melbourne - Diploma in Divinity, L.Th.

(19)     Methodist Theological School, Sarawak, Malaysia - Four-year Diploma in Theology

(20)     Michigan Theological Seminary, Michigan, U.S.A. - M.Div.

(21)     North Eastern Hill University, India- B.A. in Communication

(22)     Open Universities

(23)     Oxford University, U.K. – B.D. and M.A.

(24)     Sri Lanka- G.C.E.

(25)     Union Theological Seminary - S.T.M. in Sociology and Religion

(26)     Union Theological Seminary, New York - S.T.M.

(27)     University of Distance Education in Myanmar, Myanmar

(28)     Wheaton College, U.S.A. – M.A.

Pathian thu zirna lama Mizoram dinhmun

            Tunah hian Mizoramah SSC pawmpui Pathian thu zirna hmun pathum a awm mek a.

(1)   Kan Kohhran ta leh enkawl ATC-ah hian Dip.C.S., B.C.S., B.D., M.Th., leh D.Th. te zir theih a ni a. Tin, zirlai/Pastor nupuite a duh tan Certificate in Christian Studies (C.C.S.)- subject pasarih kum khat zir tur a awm bawk a. Lay Theological Education hnuaiah Mizoram hmun hrang hrangah a duh apiang zir theihna Mobile Theological School-te hawn thin a ni a. Mizotawngin lehkhabu tha tak tak, Thuthlung hlui leh Thuthlung thar zirchianna te, Kristian theology lam te, Sakhaw chanchin zirna te, Kohhran chanchin leh Kohhran rawngbawlna hna lam zirna lehkhabu te tihchhuah thin a ni bawk. Tin, Calvin Study Centre kalpui a ni bawk.

(2)   Kan Kohhran Synod Mission Board enkawl MTC-ah B.Miss. zir theih anih bakah missionary thawk lai mekte tan short course training kalpui mek zel a ni a.

(3)   Mizoram Baptist Kohhran ta leh enkawl Aizawl Tanhril hmuna Academy of Integrated Christian Studies (AICS) lamah B.D. leh M.Div. te zir theih a ni bawk a. Tin, M.Th. zir theih tura hmalak mek a ni.

Heng bakah hian Kohhran dangte pawhin kan kohhran theuha Pastor/rawngbawltu/tirhkoh turte inzirna leh chher hriamna hmun hi kan nei nual hlawm awm e.

Zir zawh hnuah engtinnge

Hei hi zawhna kan inzawh ngun ber pawl leh inzawh awm tak pawh a ni ang e. Pathian thu zir, a bik takin mipa lama a tam zawk chuan Kohhran rawngbawl/Pastor hna thawh hi an tum tlangpui a. Kohhran mipui nawlpui pawhin chu chu kan hmuhdan leh beisei dan a ni. Mi thenkhat phei chuan Pathian thu zir mipa tawh phawt chu Pastor zirlai ang riakah kan ngai bawk, mahse hei hi a dik lo. Pastoral ministry mai bakah mission lam te, evangelism lam te, counselling lam te, social work lam te, academic lam te, administration lam te, international NGO leh Christian organization lamah te leh, a dang kawng tam takah, kan thiam (fit for) ve tawk a, mahni kan inpek peih phawt chuan, ram chhung leh pawn thlengin rawngbawlna kawng zau tak a inhawng a ni.

Tlangkawmna

Pathian thu zir avanga Kohhran huang chhungah chauh rawngbawl hna thawh tum kher tur a ni lo. Kohhran mipuite pawhin Pathian thu zir chhuak tawh phawt chu Pastor emaw, missionary emaw ni vek tura kan beisei hi a awm viau a. Mahse hemi bak hi kan sawn a tul tawh a, a piahlam zel hi kan thlen a tul tawh. Miin kohna a dawn leh a inpekna chin chu kan sawisak thei hauh lo; chutih rualin khawvel thil deuh nia kan ngaihah pawh, Pathian thu zir chhuakten Pathian duhdan ang zela thil tha zawk a lo awm theih nan ke an pen thei a ni tih hi Pathianin a hnawl lo a, keini mihringte pawhin kan pawm a ngai a ni.

Pathian thutak leh dik hi mihring nunphung kawng tinreng mai hian a mamawh a ni. Engemaw avang te leh a kum tela hnam, vantlang leh mihring nun inthlak danglam nasa tak mai te, khawvel hmasawnna chak tak mai leh chumi avanga kan hun tawn chhoh mek te, khawvel leh a chhunga awm thil tinreng mai hian Pathian thu dik tak hi an mamawh em em zawk a ni. Chutiang kara engkimtithei leh hmun tina awm kan Pathian rawngbawl hna thawk thei tur, rawngbawltu huaisen ni tura inchher hi Pathian thu zirnain a tum ber tur a ni ang. Hei hi Theology (Pathian thu/word of God) in a tum ber pawh a ni.

He khawvela a thalo zawnga thil inthlakthleng te leh, Pathian duhloh zawng a ni tih hriat sa reng pawh su (challenge) ngam lo khawpa dawih te, aw chhuah duh tlat lo te, chutiang laka kut sil mai duh khawpa thianghlim te, ban phakloh te ban phak tura kut phar chhuak hleithei tlatlo rawngbawltu chu, a hriatna te thain ril em em mahsela, zawlneite leh zawlnei ropui ber Isua Krista hnungzui zo lo tak rawngbawltu a ni ang.

-----------------------------------------------------------------------------------------------------------------------------

Thulaknate

1.      Aizawl Theological College, Prospectus 2013 – 2014, Aizawl: ATC, 2013.

2.      Senate of Serampore College Faculty of Theology: Syllabus recommended to the Degree of Master of Theology. Serampore: The Registrar, Senate of Serampore College, 2005.

3.      Senate of Serampore College Faculty of Theology: Regulations and Syllabus related to the Degree of Bachelor of Divinity. Serampore: The Registrar, Senate of Serampore College, 2010.

4.      Senate of Serampore College (University): Summary of Course Requirements for Bachelor of Divinity under New Regulations. Serampore: The Registrar, Senate of Serampore College, 2012.

5.      Rev. Dr. H. Vanlalauva, “Senate of Serampore (University) hnuaia Doctorate zirna Programme” in Didakhe XLII/3 (May - June, 2013).

6.      www.senateofseramporecollege.edu.in

(Kan han sawi tak baka hriatbelh duh nei chuan thulakna lamah enchian theih a ni)